Umwe mu bakozi bo mu biro bya Minisitiri ufite amabuye y’agaciro mu nshingano ze, bwana Ely Muhimuzi arashinja umuyobozi w’intara ya Kivu y’Amajyepfo Theo Ngwabije kwijandika mu bucukuzi bw’amabuye y’agaciro mu buryo butemewe muri teritwari ya Mwenga muri Kivu y’Amajyepfo.
Mu gihe hakiri iperereza rigamije kugaragaza niba hari abanyamahanga bagaragara mu binombe bya Mwenga na Shabunda, Ely Muhimuzi akaba yahise agaragaza umwanzi w’amajyambere uwo ari we. Mu kiganiro ku mahoro n’iterambere cya Radio Maendeleo y’i Bukavu, uyu mugabo ahamya nta gushidikanya ko uyu muyobozi w’intara ari we uri inyuma y’ubucukuzi n’ubucuruzi bwa magendu mu mabuye y’agaciro muri Kivu y’Amajyepfo.
Bwana Ely Muhimuzi akomeza atangaza ko, Theo Ngwabije yashyize abashinwa benshi mu binombe bya Mwenga, aho uburinzi bwabo bukorwa na FARDC ku itegeko ry’uyu mukuru w’intara. Ku bashaka kumenya uburyo aba bashinwa bari muri ibi binombe, guverineri ahita abacecekesha avuga ko bahari kubw’amasezerano bafitanye n’ubuyobozi bw’i Kinshasa.
Mu kababaro kenshi, bwana Ely yavuze ko mu Binombe bya Kamituga, muri aka gace ka Mwenga, aba bashinwa bahita bahamagara umuyobozi w’ibiro by’umukuru w’intara iyo hagize umuntu ubabaza ibibazo byinshi ku byerekeranye n’akazi kabo. Akongeraho ko iyo ukibageraho bahita bakwereka impapuro zibemerera gucukura bahawe n’ubuyobozi bw’intara.
Muri iki kiganiro uyu murwanashyaka wa UDPS yagiranye n’itangazamakuru, yari agamije gutangaza ukuri kwose ku kibazo cy’icukurwa ry’amabuye y’agaciro ritemewe muri Mwenga. Ibintu byabaye nko gukora mu jisho ubuyobozi bw’iyi ntara. Mu itangazo ryashyizwe ahagaragara n’ubuvugizi bw’ibiro bya guverineri muri iyi ntara, batangaje ko Ely Muhimuzi ari umutekamutwe waje yiyitirira intumwa ya Minisitiri ufite amabuye y’agaciro mu nshingano ze ku rwego rw’igihugu.
Iri tangazo riragira riti: “ Ku makuru dufite, turabeshyuza ibyatangajwe na bwana Ely Muhimuzi, tukanamenyesha abantu bose ko uyu muntu atazwi nk’umujyanama wa Madame Minisitiri wa Mine Antoinette N’Samba Kalambayi ku rwego rw’iguhugu. Ntabwo yigeze aba umujyana wa Minisitiri, kandi na madame Minisitiri akaba atarigeze amumenya. Uyu munyabinyoma akaba ari gushakishwa n’inzego z’umutekano kugira ngo agezwe imbere y’ubutabera. Akaba agomba kuzasobanura uko guverineri yaba ari intandaro yo kuba abashinwa bari gucukura amabuye mu binombe bya Mwenga.”
Nyamoma ( ibiro bya guverineri mu ntara ya Kivu y’Amajyepfo) ntiyagarukiye aho gusa. Umuvugizi wa guverineri akaba yanatangaje ko uyu mugabo yita umutekamutwe yaba yarabeshye Hotel Panorama kugira ngo ahacumbike mu izina ry’intumwa ya Minisiteri ya mine, aho yatangaje ko azishyurirwa na diviziyo ya mine, kandi ari ibinyoma. Uyu muvigizi yagize ati: “Kubera aya mafaranga menshi uyu mugabo yakoresheje muri iyi Hotel, turasaba umuntu wagira amakuru y’aho Ely Muhimuzi aherereye ko yakwihutira kubimenyesha inzego z’umutekano.”
Gusa nyuma gato yo kugirana ikiganiro na radiyo, hari amakuru yasakaye ku mbuga nkoranyambaga avuga ko uyu mugabo yaba yafashwe na polisi, impirimbanyi nyinshi zikaba zitangaza ko yaba yafungiwe ibyo yatangaje kandi ari ukuri. Gusa amakuru twaje kumenya nuko igihe yafatwaga, atajyanwe muri pirizo, kuko urubyiruko muri iri shyaka rye rwaje kwitambika abapolisi, uyu mugabo agashobora kurusimbuka. Umwe mu rubyiruko rwa UDPS yagize ati: “Nk’urubyiruko twabirwanyije kuko twari turi ku cyumweru, hakaba nta rupapuro rwo kumufunga rwigeze rusohorwa.”
Nk’uko impirimbanyi za demokarasi zabitangaje, bwana Ely Muhimuzi ntabwo ari umuntu utazwi. Amakuru y’ukuri agaragaza ko ari umukozi wa Minisiteri ya mine ku rwego rw’igihugu. Ni umukozi mu ishami ry’ubugenzuzi. Muri iyi ntara amajwi menshi yumvikanisha ko uyu murwanashyaka wa UDPS ko atari ubwa mbere aje muri iyi ntara mu butumwa bw’akazi.
Minisitiri wa mine muri iki gihugu, nawe nawe akaba ari mu ntara ya Kivu y’Amajyepfo, aho nawe ari mu rungabangabo nyuma y’uko iki kiganiro giciye kuri radiyo kigaragaza ubujura bw’umutungo wa leta gishyira guverineri mu majwi, kandi ari we ugomba kumwakira muri iyi ntara. Aho hari amakuru avuga ko ibiro bya guverineri nta makuru bifite kuri uru ruzinduko.
Perezida w’ishyaka rya UDPS ku rwego rw’intara, udashyigikiwe n’abarwanashya muri iyi ntara, we akaba yahisemo gushyigikira uruhande rwa guverineri w’intara aho yamaganiye kure ikiganiro bwana Ely yagiranye n’itangazamakuru. Mu gihe uyu Ely Muhimuzi akaba afatwa n’abarwanashyaka ba UDPS nk’intwari y’ishyaka muri Bukavu.
I Mwenga, teritwari ikize cyane kuri zahabu, habarurwa abacukuzi b’amabuye y’agaciro benshi bakomoka hanze y’igihugu barimo abashinwa bakora aka kazi mu buryo butemewe n’amategeko, nk’uko bitangazwa n’imiryango itegamiye kuri leta na sosiyete sivili. Akenshi bakiyita ko bakorera ibigo bikemangwa ko nabyo byaba bidafite ibyangombwa bibyemerera gukora. Aba bantu bakaba bigarurira ubutaka bw’abaturage ku ngufu.
Umutekano muri ibi birombe ukaba ucungwa n’ingabo za leta FARDC, aho abayobozi b’inzego z’ibanze batangaza ko aba bashinwa batangiye gucukura aha hantu mu buryo butemewe kuva mu 2018, bwana Heritier Mukamba wigeze kuba visi-guverineri muri iyi ntara yagize ati: “Umubare w’amasosiyeti akora ubucukuzi wavuye kuri atanu mu mwaka wa 2019, ukagera ku 10 muri 2021.” Uyu mugabo aributsa ko muri 2020 akiri visi-guverineri, yari yasinye itegeko rihagarika aya masosiyeti yose akorera i Mwenga kuko akora mu buryo butemewe n’amategeko. Akaba ababazwa n’uko ubwo umuyobozi w’intara uriho yamaze kujya ku buyobozi, yahise atesha uyu mwanzuro agaciro.
Icyibazwa kuri ubu, Ese ibyo Ely Muhimuzi yatangaje biragira icyo bihindura? Ese bizagaragaza uruhare rwa buri umwe muri iki kibazo nta numwe uhishiriwe? Ese bizafasha gushyira ibintu ku murongo muri aka gace gasigaye kitwa Ubushinwa bushya? Ku buryo ubwo ari bwo bwose, abaturage ba Kivu y’Amajyepfo, nibyo bakeneye cyane muri iyi minsi.
Denny Mugisha
