Umukinnyi wahoze akinira ikipe ya Kiyovu Sports ariwe Nsanzimfura Keddy ariko akaba yamaze kwerekeza mu ikipe ya APR FC, Kiyovu Sports ikaba itari gukozwa kuba yagiye muri APR FC.
Kuri iki cyumweru tariki ya 19/07/2020 nibwo ikipe ya APR FC yerekanye abakinnyi izakoresha mu mwaka wa 2020/2021, muri abo bakinnyi hagaragayemo umukinnyi wahoze akinira Kiyovu Sports ariwe Nsanzimfura Keddy, byavugwaga ko yari agifite amasezerano y’imyaka 5 muri Kiyovu Sports.
Nyuma yo kwerekanwa kwa Keddy muri APR FC ntabwo ubuyobozi bwa Kiyovu Sports bwabyishimiye, kubera ko buvuga ko Keddy yasinye mu buryo bunyuranyije n’amategeko ndetse ko bagiye kwiyambaza FERWAFA kugira ngo ibarenganure, nyamara APR FC ikavuga ko Keddy nta masezerano yari afitiye Kiyovu Sports.
Ubuyobozi bwa Kiyovu Sports bwatangaje ko bugiye kwandikira Ishyirahamwe ry’Umupira w’Amaguru mu Rwanda (FERWAFA) burega APR FC yatwaye umukinnyi wayo, Nsanzimfura Keddy, kandi nta biganiro byabaye hagati y’impande zombi.
Ntarindwa Theodore Visi Perezida wa Kiyovu Sports yatangaje ko ibyo APR FC yakoze byabababaje kubera ko nta biganiro bigeze bagirana, Theodore akomeza avuga ko icyabababaje cyane ari uko APR FC yabafashe nk’ikipe itabaho ndetse nk’ikipe itagira ubuyobozi, igatwara Keddy batavuganye kandi nyamara bari bamushyize mu bakinnyi bazifashisha mu mikino ya Pre-Season
Theodore akomeza asaba FERWAFA ko yakwihutira kubaha igisubizo kijyanye na Keddy kubera ko umwaka ushize ubwo baregaga AS Kigali batinze kubasubiza, bakaza gusubizwa ari uko shampiyona irangiye.
Theodore yavuze ko amasezerano bafitanye na Keddy bayasinyanye n’umubyeyi we kubera ko Keddy yari akiri umwana.
Gusa Keddy ubwo yagiranaga ikiganiro n’itangazamakuru yavuze ko ubwo bamusinyishaga amasezerano bamufatiranye kubera ko yari umwana afite imyaka 17, ndetse ko yasinyiye ikipe ya APR FC kubera ko buri mukinnyi wese aha mu Rwanda aba ashaka gukina mu makipe abiri akomeye ariyo APR FC cyangwa se Rayon Sports, avuga ko abaye umwe muri abo bakinnyi basinyiye imwe muri ayo makipe.
Nkuko ikipe ya APR FC ibivuga, yamenyesheje ko yamenye ko yasinyishije Nsanzimfura Keddy igendeye ku miterere y’amasezerano yasinyanye na Kiyovu Sports adafite agaciro
Nsanzimfura Keddy yasinyiye APR FC amasezerano y’imyaka ibiri, ku wa 21 Gicurasi 2020, akaba ari umukinnyi w’imyaka 18 yari Kapiteni w’Ikipe y’Igihugu y’Abatarengeje imyaka 17 yitabiriye imikino yo gushaka Igikombe cya Afurika cya 2019, yabereye muri Tanzania mu 2018.
Ni mu gihe umunyamabanga wa APR FC yatangaje ko intego APR FC ifite ari ugutwara ibikombe by’aha mu Rwanda ndetse bakaba bihaye intego yo kugera muri 1/8 mu mikino ya CAF Champions League bagiye kwitabira.
Ndacyayisenga Jerome
