Komosiyo y’Amatora muri Uganda yamaganye ihohoterwa rikomeje gukorerwa abakandida biyamamariza kuyobora Uganda nk’aho Bobi Wine n’itsinda rimufasha kwiyamamaza barajwe mu modoka nyuma yo kwangirwa kwinjira muri Hoteli.
Ku mugoroba wo kuri uyu wa Kane nibwo umukandida w’ishyaka NUP Robert Kyagulanyi uzwi nka Bobi Wine, yabujijwe n’abashinzwe umutekano kwinjira muri hoteli yo mu gace ka Migyera aho yagombaga kurara akabyuka akomeza ibikorwa bye byo kwiyamamaza.
Mu burakari bwinshi Bobi n’abayoboke be bahisemo kurara mu modoka zabo. Mu masaha y’igitondo, amashusho yakwirakwijwe ku mbuga nkoranyambaga, agaragaza uyu mugabo ushaka kuba Perezida, asutamye hanze, afite agacupa k’amazi yo kunywa ari gukaraba mu maso.
Polisi yavuze ko yafashe umwanzuro wo kumubuza kujya muri hotel kuko we n’abantu be batari kuyikwirwamo.
Mu ibaruwa Perezida wa Komisiyo y’amatora yandikiye umuyobozi wa Polisi IGP Martin Okoth Ochola yamusabye guhagarika ibikorwa bibangamira imigendekere myiza y’amatora bikomeje gukorwa na Polisi ya Uganda byiganjemo guhutaza abakandida bigenga n’abamashyaka atavuga rumwe n’ubutegetsi bwa Perezida Museveni.
Ildephonse Dusabe
