Kompanyi ya Rwanda Inspiration Backup yateguraga Irushanwa rya Miss Rwanda, yaryambuwe, rihabwa Minisiteri y’Urubyiruko n’Umuco binyuze mu Nteko y’Umuco.
Nyuma y’uko Minisiteri y’Urubyiruko n’Umuco itangarije ko iri rushanwa rya Miss Rwanda ribaye rihagaritswe, kuri uyu wa Kabiri tariki 10 Gicurasi 2022, byatangajwe ko iri rushanwa ryambuwe abariteguraga.
Rwanda Inspiration Backup yateguraga iri rushanwa ikaba yaryambuwe, yashinzwe na Ishimwe Dieudonne uzwi nka Prince Kid ubu ukurikiranyweho ibyaha bifitanye isano n’ihohoterwa rishingiye ku gitsina ryakorewe bamwe mu bakobwa bitabiriye Miss Rwanda mu bihe binyuranye.
Kuba iri rushanwa ryashyizwe mu biganza bya Minisiteri y’Urubyiruko n’Umuco binyuze mu Nteko y’Umuco, ntibikuraho icyemezo cyo kuba rihagaritswe ahubwo bivuze ko Rwanda Inspiration Backup yakurikiranaga ishyirwa mu bikorwa ry’imishinga ya ba Nyampinga b’u Rwanda, bizakurikiranwa n’Inteko y’Umuco aho gukomeza gukurikiranwa na Rwanda Inspiration Backup.
Irushanwa rya Miss Rwanda rimaze iminsi rivugwamo amakuru ashingiye kuri Ishimwe Dieudonne AKA Prince uherutse gutabwa muri yombi akurikiranyweho gukorera bamwe mu bakobwa baryitabiriye ihohoterwa rishingiye ku gitsina.
RWANDATRIBUNE.COM
