Kuva mu gitondo cyo kuri iki cyumweru Ku mupaka wa Malaba uhuza Uganda na Kenya haravugwa imyigaragambyo y’abashoferi batwara amakamyo yinjira cyangwa asohoka kuri uwo mupaka.
Ni imyigaragambyo yakozwe n’abashoferi batwara amakamyo yinjira ndetse nasohoka kuri uwo mupaka aho bari kwinubira uburyo bari gupimwa icyorezo cya Corona Virus Ku ruhande rw’igihugu cya Uganda, aho bari kuvuga ko uburyo bari gupimwa bitizewe ndetse n’ibikoreaho biri gukoreshwa Kuri uwo mupaka bikaba bidakoreshwa Ku yindi mipaka basanzwe bacaho.
Umwe mu bashoferi b’Abanyarwanda uri kuri uwo mupaka waganiriye na rwandatribune.com yavuze ko bari kwigaragambya basaba guhindurirwa uburyo bari gupimwa Corona Ku ruhande rwa Uganda ndetse nibikoresho biri gukoreshwa.
Yakomeje avuga ko bari kubapima babajomba akantu kakuma mu mazuru ku buryo kari kubababaza ikindi ni uko kuyindi mipaka ngo babapimisha igikoresho gipima ubushyuhe cyonyine nta kindi.
Ikindi ngo ni uko no kubona ibisubizo biri gutinda kuburyo umushoferi agomba kumara iminsi 3 kugira ngo ahabwe ibisubizo.
Kuri ubu kuri uyu mupaka wa Malaba ibikorwa byose byahagaze nta modoka iri kwinjira cyangwa ngo isohoke mugihe iyi myigaragambyo igikomeje, amakuru atugeraho akaba avuga ko hari imodoka nyinshi z’ibihugu bitandukanye zagombaga guca kuri uyu mupaka ziparitse mu gihe iki kibazo kitarakemuka.
Norbert Nyuzahayo
