Mu mpera z’icyumweru twashoje , impaka zabaye nyinshi ku mbuga nkoranyambaga ,ubwo mu mujyi wa Kigali hafatwaga abageni bakarazwa kuri Sitade bazira kurenga ku mabwiriza yo kwirinda Covid-19.
Ifoto y’uyu mugeni yakwirakwijwe hirya no hino ku mbuga nkoranyambaga, abantu benshi biganjemo ibyamamamare bakomeje kugira byinshi bayitangazaho aho bamwe bemeza ko nubwo barenze ku mabwiriza bitakabaye ngombwa ko barazwa muri Sitade, mu gihe abandi bahamya ko bikwiye kuko nkuko Covid-19 itarobanura abo ifata n’abageni bakabaye bubahiriza amabwiriza uko bikwiye.
Ibi byatumye ubwanditsi bwa Rwandatribune bwibaza ikibazo kigira kiti”Ese Kuraza abaturage muri Sitade bimaze iki mu kurwanya Covid-19?
Dukurikije ibitekerezo bitangwa ku mbuga nkoranyambaga, biragoye kwemeza ko hari umumaro munini kuraza abantu muri Stade bigira.
Gusa nanone abenshi mu bo twakoresheje ibitekerezo byabo bagaragaza ko kuba hari igihano cyo kuraza abantu kuri Stade bwanacya bakishyura amande asanzwe acibwa abarenze ku mabwiriza bituma abaturage bakomeza kuzirikana ko Covid-19 igihari.
Umuhanzikazi Clarisse Karasira abinyujije ku gitekerezo yanyujije kuri Facebook, yagaragaje ko kuraza abantu muri Sitade [Yagarutse kuri ya foto y’umugeni wicaye muri Sitade] ari igikorwa kigayitse ndetse cyakabaye gifatwa nko guhonyora uburenganzira bwa Muntu. Yagize ati”Nababajwe n’iki gikorwa.Umuyobozi wacu w’icyitegererezo Paul Kagame yatwigishije kubaha uburenganzira bw’ikiremwamuntu, gusa urebye iki gikorwa cyakozwe nta bumuntu burimo”
Abandi benshi biganjemo abakoresha imbuga nkoranyambaga bakomeje gutanga ibitekezo byiganjemo ibinenga Polisi y’u Rwanda , bashinja gutatira indangagaciro ziranga ikiremwamuntu.
Uwitwa Rutarindwa yifashishije urukuta rwe rwa Twitter maze agira ati “Mwabonye amashusho ari gukwirakwira ku mbuga nkoranyamabaga y’abageni bari kwerekanwa nyuma bakajyanwa kuri stade bashinjwa kwica amabwiriza yo kwirinda Covid-19! Ese byari ngombwa? Umugeni mu gatimba muri Stade? Ku munsi wabo w’ubukwe?”
Abandi barimo Fiona Kamikazi Rutagengwa we yavuze ko atumva ibyakozwe na Polisi, ko inzego zishinzwe iyubahirizwa ry’amategeko iteka zibutswa ko ari ukuvogera uburenganzira bw’ukekwa bwo gufatwa nk’umwere igihe cyose urukiko rutaramuhamya icyaha, ati “ariko ntabwo bajya babyumva”.
Twibukiranye amabwiriza yo kurwanya covid-19
Ubusanzwe uburyo bwiza bwo kurwanya Covid-19 ni ukwirinda kuyandura, iyo wayanduye ugirwa inama yo kwirinda kujya mu bantu benshi kuko biba bishobora kubanduza. Andi mabwiriza arimo gukaraba intoki, guhana intera , gukaraba neza ibiganza no kwambara agapfukamunwa bikaza biyashimangira haba kubakingiwe no kubatarakingirwa, abanduye n’abatarandura.
Tugendeye mubyo abahanga mu by’ubuzima batanga nk’uburyo bwagabanya Covid-19 kurwego mpuzamahanga , kuraza abantu kuri Sitade ntibirimo.
Mu Rwanda amabwiriza agenga imyitwarire muri Covid-19 ashyirwaho na Guverinoma hashingiwe kuko ubwandu bushya buhagaze mu gihugu. Guverinoma igena amande acibwa uwarenze ku mabwiriza kenshi aza aherekejwe n’umwanya wagenewe guhwitura abarenze kuri ayo mabwiriza , aho barazwa muri Stade bigishwa ububi bwa Covid-19 ijoro ryose.
Cyakora mu baturage baganiriye na Rwandatribune.com bahuriza ku kuba hari ubwo uwafashwe yarenze ku mabwiriza yo kurwanya Covid-19 ashobora kumara amasaha 24 muri Sitade igihe cyose aba atarabona amafaranga yo kwishura amande.
Ku ruhande rwa Polisi y’igihugu rwo rwemeza ko uburyo bwo kwirinda guhanwa ari ukwirinda kurenga ku mabwiriza. Umuvugizi wa Polisi y’igihugu akunze kumvikana kenshi mu itangazamakuru no kumbuga nkoranyambaga yibutsa abantu ko Leta itazigera ijenjekera abarenga ku mabwiriza yo kurwanya Covid-19.
Mu kiganiro yahaye Igihe abageni bamaze gufatwa , CP John Bosco Kabera yavuze ko na mbere yo gutangira gufata abantu, bari bababuriye ko abategura ibirori n’abageni bashobora kuzajya bisanga muri stade, bityo ko ingamba ziri gukorwa zije nyuma yo kuburira abantu.
Yagize ati “Rwose ntituzarambirwa, aho ibi bikorwa birenga ku mabwiriza byagaragaye, polisi izajya ihita ihagera.”
