Patrick Muyaya Umuvugizi wa Leta muri Repuburika ya Demokarasi ya Congo yashimiye abaturage ba Congo muri rusange ko bitwaye neza mu matora yabaye ejo ku wa 20 Ukuboza 2023, n’ubwo kugeza ubu hataratangazwa uwaba yatsinze aya matora .
Mu gihe abatavuga rumwe n’ubutegetsi bavuga ko aya matora yagenze nabi, uyu muvugizi wa leta arashimira abanyekongo ko bitabiriye igikorwa cy’amatora kandi bahagereye ku gihe.
Yakomeje ashimira komisiyo ishizwe ibikorwa by’amatora CENI ko yakoze ibishoboka amatora akaba ku itariki yari yateganyijwe.
Ni mugihe kandi Muyaya yakomeje asaba abanyagihugu ituze muri iki gikorwa kitararangira, abasaba gutora mu mahoro ndetse no mu ituze avuga ko buri muturage yemerewe gutora .
Yakomeje asaba urubyiruko ituze bakirinda ibihuha, bakirinda amakuru aturuka ku mbuga nkoranyambaga , bagategereza ibiva mu matora. Yamaganye kandi ibikorwa by’ubugizi bwa nabi byibasiye ibiro bimwe na bimwe by’amatora.
UMUTESI Jessica
Rwandatribune.com
