Leta y’Ubutaliyani yiyambaje Imodoka za gisirikare ngo abe ari zo zitwara imirambo y’abakomeje guhitanwa n’icyorezo cya Virusi ya Corona, mu gihe umubare w’abakomeje kucyandura no kwivuganwa na cyo ukomeje kwiyongera muri kiriya gihugu.
Ku wa 20 Werurwe, Ubutaliyani bwatangaje ko abamaze kwandura icyorezo cya Virusi ya Corona ari 47,021 mu gihe abo cyari kimaze guhitana ari 4,032.
Mu munsi umwe gusa hari hamaze kwandura abantu 5,976, mu gihe abapfuye ari 627; ibishimangira buryo ki iki gihugu gikomeje gushegeshwa na kiriya cyorezo.
Urubuga news.phxfeeds.com ruvuga ko uburuhukiro bw’ibitaro bitandukanye bwari bwuzuye, biba ngombwa ko Leta yiyambaza imodoka nyinshi z’igisirikare ngo abe ari zo zitanga umusada wo gutwara imirambo.
Nko mu Mujyi wa Bergamo uri mu yashegeshwe cyane na Virusi ya Corona, harabarurwa abantu 93 bamaze guhitanwa na Virusi ya Corona.
Umuyobozi w’uyu mujyi, Giorgio Gori, yavuze ko biteze ko umubare w’abahitanwe na Coronavirus ushobora kwiyongera, kubera ko abenshi mu bakekwagaho iki cyorezo bapfa mbere y’uko basuzumwa.
Jean Pierre Ramponi, Umuyobozi mu Bitaro bya Brescia, we yavuze ko batazi aho bari bujyane bamwe mu barwayi kubera ubwinshi bwabo. Ati” Muri 450 barwariye iwacu, 220 baranduye. Ibintu birenze ukwemera kubera ko abarwayi ari benshi cyane ku buryo tutazi aho kubajyana.”
Magingo aya igihugu cy’Ubutaliyani ni cyo gifite umubare munini w’abahitanwe na Coronavirus ku isi, kuko cyamaze gutambuka ku Bushinwa iki cyorezo cyabanje kugaragaramo. Mu Bushinwa abahitanwe na Coronavirus ni 3,248.
Coronavirus igira ibimenyetso birimo inkorora, umuriro ndetse n’imisonga. Kugira ngo ikumirwe, inzego z’ubuzima zisaba abaturage gusaba ubujyanama ku babishinzwe mu gihe bagaragaje ibi bimenyetso.
Minisiteri y’Ubuzima yashyizeho umurongo utishyurwa wa 114 wo guhamagaraho mu gihe umuntu agize ikibazo nko kwikekaho iki cyorezo, cyangwa se akagana umujyanama w’ubuzima umwegereye.
Hategekimana Jean Claude
