Umuhungu w’uwahoze ari perezida wa Libya Col Muammar Kadhafi kuri uyu wa kabiri yakuwe ku rutonde rw’abashaka kuba abakandida mu matora y’umukuru w’igihugu ateganyijwe tariki 24 Ukuboza (ukwa 12).
Komisiyo y’amatora yangiye abakandida benshi kuri uyu mwanya barimo Saif al-Islam Kadhafi, ivuga “impamvu z’amategeko”, nk’uko ibinyamakuru byaho bibivuga.
Seif al-Islam asanzwe ashakishwa n’urukiko mpuzamahanga mpanabyaha ku byaha by’intambara n’ubwicanyi ubwo se yari akiri ku butegetsi. Yiyandikishije kuba umukandida ku itariki ya 14 y’uku kwezi. Ari mu bandi bakandida 25 dosiye zabo zanzwe nkuko iyo komisiyo yabivuze.
Kimisiyo y’amatora yavuze ko yanze kandidatire z’abo bakandida yisunze impapuro bashyiriweho n’inkiko hamwe n’amakuru kuri bo yatanzwe n’ubutabera.
Uyu Seif al-Islam, yari yaraciriwe kandi urubanza rwo gupfa n’urukiko rw’i Tripoli mu 2017 ku byaha ashinjwa ko yakoze igihe hari imyivumbagatanyo yanahitanye se. Ariko nyuma yaje kubabarirwa na leta ikorera mu burasirazuba bwa Libiya.
Gusaba guhatanira uwo mwanya kwa Khalfa Haftar nako kwateje impaka zikomeye mu gihugu kuko aregwa ibyaha bikomeye mu nkiko za Amerika, ariko ntabwo bizwi neza niba nawe ari mu bangiwe kwiyamamaza.
Abashinjacyaha ba gisirikare muri Libya basabye komisiyo y’amatora kwanga kandidatire za Kadhafi na Haftar kugeza basubije ibibazo ku byo baregwa.
Kugeza ku munsi ntarengwa wo kuwa mbere, abantu 60 bari batanze inyandiko basaba guhatanira kuba perezida.
Impirimbanyi y’uburenganzira Leila Ben Khalifa w’imyaka 46, niwe mugore rukumbi uri mu bifuza guhatana.
