Ikipe ya Liverpool yisasiye ikipe ya Linzer Athletik Sport Klub yo muri Autriche ibitego 3-1, Brighton & Hove Albion itungurwa na AEK Athens iyitsinda ibitego 3-2, mu mukino wa mbere w’amatsinda muri UEFA Europa League.
Nyuma y’imikino ya UEFA Champions League, mu ijoro ryo ku wa Kane, tariki 21 Nzeri 2023 hakinwaga imikino y’umunsi wa mbere w’amatsinda ya Europa League.
Nyuma y’umwaka mubi yagize, Ikipe ya Liverpool yo mu Bwongereza yongeye kwisanga muri iri rushanwa yaherukagamo mu 2016 ubwo yatsindwaga ku mukino wa nyuma na Seville.
Umukino wa Liverpool yawutangiye nabi kuko Linzer Athletik Sport Klub ari yo yatangiye iri hejuru ndetse bidatinze ku munota wa 14 gusa, Florian Flecker yafunguye amazamu mu gihe Liverpool yari ikiri kwisuganya.
Iyi kipe yakomeje kurinda igitego cyayo ibuza abakinnyi ba Liverpool nka Mohamed Salah, Darwin Ñúñez gutsinda.
Igice cya Mbere cyarangiye iyi kipe yo muri Autriche iyoboye umukino ku igitego 1-0.
Liverpool yasubiranye imbaraga nyinshi mu gice cya kabiri, irasatira bikomeye, nyuma y’iminota 10 gusa abakinnyi ba LASK bari basumbirijwe bakoreye ikosa Luis Díaz mu rubuga rw’amahina umusifuzi atanga penaliti.
Iyi kipe yo mu Bwongereza ntiyagiye kure, yakomeje gusatira cyane, Harvey Elliott yahereje umupira mwiza Luis Díaz atsinda igitego cya kabiri ku munota wa 63.
Umukino wahise utuza, LASK yongera gukora ku mupira cyane ndetse no guhusha uburyo bw’ibitego.
Umukino ugana ku musozo, Salah yazamukanye umupira neza atsinda igitego cya gatatu ku munota wa 88, anyujije umupira mu maguru y’umunyezamu.
Umukino warangiye Liverpool yatsinze Linzer Athletik Sport Klub ibitego 3-1.
Muri iri tsinda E, Ikipe ya Union St Gilloise yanganyije igitego 1-1 na Toulouse yo mu Bufaransa.
Mu yindi mikino yabaye, West Ham United yo mu Bwongereza yatangiye neza itsinda TSC Backa Topola ibitego 3-1, Olympiacos yo mu Bugereki biri kumwe mu itsinda rya mbere itsinda Freiburg yo mu Budage ibitego 3-2.
Irindi tsinda ryari rihanzwe amaso ni irya kabiri, ririmo Brighton & Hove Albion yo mu Bwongereza yatangiye itungurwa na AEK Athens iyitsinda ibitego 3-2, mu gihe Ajax Amsterdam yo mu Buholandi yanganyije na Olympique Marseille yo mu Bufaransa ibitego 3-3.
Aya makipe azasubira mu kibuga mu mpera z’icyumweru akina Shampiyona zitandukanye zo mu bihugu byazo.
UMUTESI Jessica
