mvugo y’umuhanga mu bumenyi bwa virus, Luc Montagnier, wavuze ko Coronavirus yakorewe muri laboratwari yo mu Bushinwa yateje impaka mu muryango mugari w’abaganga.
Umufaransa Luc Montagnier wahawe n’igihembo cyitiriwe Nobel mu 2008, yavuze ko kuva mu 2000 laboratwari yo mu Mujyi wa Wuhan yakomeje gukora ubushakashatsi kuri Coronavirus, igerageza kuyibyaza urukingo rwa Sida.
Ibi ni byo aheraho avuga ko COVID-19 yakorewe muri iyo laboratwari [Wuhan National Biosafety Laboratory], ikaza kugera hanze mu bantu, none ubu ikaba ikomeje gukwirakwira ndetse ikanica abatari bake.
Icyorezo cya COVID-19, gituruka ku gakoko ka Coronavirus cyatangiriye mu Bushinwa mu Ukuboza 2019. Kuva icyo gihe cyatangiye gukwirakwira mu mpande zose z’Isi, aho kuri ubu 2 231 990 bacyanduye, cyahitanye 153 252 mu gihe 568 218 bagikize.
Luc Montagnier avuga ko COVID-19 itakomotse mu nyamaswa zacururizwaga mu isoko rya Wuhan riri mu Ntara ya Hubei.
Yagize ati “Ni inkuru mpimbano itarabayeho. Ntibishoboka na gato. Iyi virus yavuye muri laboratwari yo muri Wuhan. Ukuri kwa siyansi birangira kwigaragaje.’’
Ibi Prof Luc Montagnier abishingira ku kuba ubushakashatsi aherutse gukora bwaramweretse ko COVID-19 irimo uturemangingo twa virus ya VIH itera Sida, ibintu ahurizaho n’abandi bashakashatsi bo mu Buhinde, ubushakashatsi bwa bo bukaba bwarapfukiranwe mbere yo kubugaragaza.
Umuhanga mu bijyanye n’ubumenyi bwa virus, Étienne Simon-Lorière, ukora mu Kigo gikora ibijyanye n’inkingo cya Institut Pasteur mu Bufaransa yabwiye AFP ko ibyatangajwe na Montagnier bihabanye n’ukuri.
Ati “Nta shingiro bifite. Utu ni uduce duto cyane dusanga mu zindi virusi zo mu muryango umwe, na zo ni Coronavirus mu miterere yazo.’’
Yongeyeho ko impinduka zivugwa zakozwe kuri virusi ya VIH ‘ni ibinyoma bidashidikanywaho’.
Nature.com itangaza ko inyigo ya Laboratwari ya Wuhan n’iyubakwa ryayo byatangiye mu 2004 ku bufasha bw’u Bufaransa nkuko byari bikubiye mu masezerano yo kwirinda no gukurikirana ubwiyongere bw’indwara zandura.
Imiterere y’uyu mushinga yatumye leta zitinda kuwushyiramo imbaraga kugeza ubwo 2014 yasanze imirimo yo kuyubaka itarasozwa.
Montagnier asanzwe atavuga rumwe n’abashakashatsi benshi, nyuma y’aho kuva mu 2009 yakomeje kugaragaza ibitekerezo bye bishingiye ku bushakashatsi akora ku miterere ya VIH n’uburyo ikwirakwira, bitandukanye n’uko abandi bashakashatsi babigaragaza.
Uyu muganga yahawe igihembo cyitiriwe Nobel nyuma yo kuvumbura agakoko gatera sida, afatanyije na Françoise Barré-Sinoussi.
Mu 2017, ihuriro ry’abahanga bigisha ubuvuzi basabye urugaga rw’abaganga ko rwamushyiriraho ibihano kubera ibitekerezo bye birwanya urukingo rwari ruri gutangwa mu Bufaransa.
Umufaransa Luc Montagnier yavugaga ko urwo rukingo rugamije kuroga buhoro buhoro abaturage bakiri bato.
Inkomoko ya COVID-19 ikomeje kuba ikibazo gikomeye hagati ya Leta Zunze Ubumwe za Amerika n’u Bushinwa, aho buri gihugu gishinja ikindi kuba ari cyo cyakoze iyi virus ikomeje kuyogoza Isi.
Leta Zunze Ubumwe za Amerika zatangiye iperereza rigamije kureba niba koko COVID-19 yaraturutse ku nyamaswa cyangwa yarakozwe n’Abashinwa.
Kugeza ubu bikekwa ko COVID-19 yaturutse mu ducurama, turi muri zimwe mu nyamaswa zacururizwaga mu isoko rya Huwan zikiri nzima.
Ibivugwa na Luc Montagnier biramutse ari ukuri, byaba bishimangira ko u Bushinwa butigeze bugaragaza umucyo ku kibazo cya Coronavirus, kuva yatangira kuvugwa mu Ukuboza 2019.
Muyobozi Jerome
