Abanyapolitiki bo muri Repubulika Iharanira Demokarasi ya Congo, bakomeje gushinjanya kugira uruhare mu gutuma Umutwe wa M23 wongera kuzuka, ugatangiza imirwano mu burasirazuba bw’iki gihugu guhera mu mpera z’Umwaka wa 2021.
Ni ibyagarutsweho n’Abanyapolitiki bo mu ishyaka PPRD rya Joseph Kabila wahoze ari perezida wa Repubulika Iharanira Demokarasi ya Congo, bashinja bakeba babo bo mu ihuriro “Union Sacree” rigizwe n’amashyaka ashyigikiye Perezida Tshisekedi, kongera kurema no gukorana n’Umutwe wa M23.
Hussein Nembongo umwe mu bahagarariye ishyaka PPRD mu mujyi wa Beni ubwo yari mu kiganiro n’itangazamakuru kuwa 13 Gicurasi 223, yatangaje ko Joseph Kabila akiri Perezida, yabashije guhangana n’ Umutwe wa M23 ndetse abasha kuwutsinda awirukana ku butaka bwa DR Congo mu 2012.
Uyu munyapolitiki, yakomeje avuga ko Perezida Tshisekedi n’ihuriro Union Sacree bakimara kugera k’Ubutegetsi, batumiye M23 i Kinshasa bagirana ibiganiro avuga ko byebereye mu bwiru bukomeye.
Hussein Nembongo, avuga ko ibyavugiwe muri ibyo biganiro byagizwe ibanga rikomeye ndetse ko hari ibyo M23 yumvikanyeho na Perezida Tshiseked n’ihuriro Union Sacree, ari nawo musaruro wo kongera kuzuka kwa M23 mu 2021.
Ati:” M23 ni ishyaka rya Politiki ryongeye kuremwa n’ihuriro Union Sacree ya Perezida Tshisekedi.Uko Ubutegetsi buriho muri DRC bwitwara mu kibazo cya M23 ni ikintu kibabaje kandi bigaragara ko harimo amacenga akabije. Joseph Kabila wahoze ayobora DR Congo yari yabashije gutsinda uyu mutwe ,ariko twabonye bamwe mu bahagarariye M23 batumirwa i Kinshasa bamarayo ibyumweru 14 bikozwe n’Ubutegetsi buriho . Hari amasezerano basinye yagizwe ibanga kandi babiziranyeho.”
Hussein Nembongo, yakomeje avuga ko kuba Guverinoma ya DR Congo ntacyo yatangarije Abanye congo kuri iyo ngingo, “byatewe n’uko hari icyari cyibyihishe inyuma, Perezida Tshisekedi n’ihuriro Union Sacree baziranyeho na M23 ”
Yangeyeho ko M23,ubu iri kugenzura ibice byinshi muri muri Kivu y’Amajyaruguru mu maso y’Abanye congo bose na Guverinoma yabo ndetse ko Perezida Tshisekedi, agomba gutangariza Abanye congo ibyavugiwe mu biganiro yagiranye na M23 icyo gihe bari i Kinshsasa bikiri mu maguru mashya.
Claude HATEGEKIMANA
Rwandatribune.com
