Sosiyete sivile yo muri Teritwari ya Nyiragongo, yatangaje ko M23 yashinze ubuyobozi bushya muri Gurupoma ya Kibumba no mu bindi bice bagenzura.
Nk’uko perezida wa Sosiyete sivile Bwana Mambo Kawaya, yabitangaje ngo ubuyobozi bushya bwa M23, ba bushyize muri Gurupoma ya Kibumba.
Yakomeje avuga ko ubwo buyobozi babushyizeho mu rwego rwo kugirango babashe kugenzura ibice barimo haba mu rwego rw’igisirikare ndetse n’urwagisivile.
Ubwo buyobozi bushyizweho nyuma y’imirwano ikaze yakomeje guhuza M23 n’ihuriro ry’imitwe y’itwaje intwaro ifasha ingabo za Repubulika ya Demokarasi ya Congo kurwanya inyeshyamba za M23, bikarangira M23 yambuye ingabo za leta ya Congo, Kibumba n’ibindi bice byo muri Teritwari ya Nyiragongo, Masisi na Rutshuru.
Gusa ibi ntacyo umutwe wa M23 urabitangazaho. Perezida wa Sosiyete sivile, Mambo Kawaya, akaba yahamagariye abanye Congo guhaguruka bakamagana umutwe wa M23 bakoresheje imyigaragambyo, aho yasabye n’urwego rushinzwe ubutasi mu ngabo za Repubulika ya Demokarasi ya Congo (ANR) na DGM ishinzwe abasohoka n’abinjira mu gihugu kubana n’abaturage maze ngo bakamagana umutwe wa M23.
Mambo Kawaya, akaba ashinja umutwe wa M23 kuba bafata ubutaka bwa Congo, bakabuhuza n’ubutaka bw’u Rwanda.
Yagize ati: “Ubu nta mupaka ukihari ubutaka bugenzurwa na M23 bakuyeho imipaka ibahuza n’u Rwanda.”
Ibi bibaye mu gihe umuvugizi wa M23 mu bya Politike, Bwana Lawrence Kanyuka, ashinja ihuriro ry’ingabo za Kinshasa, FDLR, FARDC, Wagner Imbonerakure z’u Burundi na Wazalendo, gutera ibibombe mu baturage no mu bikorwa remezo bigasenya imihanda muri Gurupoma ya Bambo, Kishishe no mu nkengero zaho.
Yagize ati: “Ihuriro ry’ingabo za Kinshasa, FDLR, FARDC, Wagner, Imbonerakure z’u Burundi, na Wazalendo, baratera ibibombe bigasenya ibikorwa remezo harimo Imihanda yo mu bice bya Gurupoma ya Bambo, Kishishe no mu nkengero zaho.
Akomeza avuga ko inyeshyamba za M23 zikomeje kurwana ku baturage n’ibyabo.
Teritwari ya Nyiragongo iri mu Ntara ya Kivu y’Amajyaruguru, mu gihugu cya Repubulika ya Demokarasi ya Congo.
Uwineza Adeline
Rwandatribune.Com
