Perezida wa Malawi Dr. Lazarus McCarthy Chakwera yatangaje iminsi itatu y’ikiriyo cy’abaminisitiri 2 muri Guverinoma ye bishwe na Covid-19.
Kuri uyu wa Kabiri nibwo hamenyekanye ko abaminsitiri 2 muri Guverinoma ya Malawi n’abandi bakozi ba Leta ku rwego rwo hejuru bahitanwe na Covid -19.
Mu ba Minisitiri bahitanwe na Covid-19 harimo Minisitiri w’Ubutegetsi bw’igihugu Lingson Belekanyama na Minisitiri wo gutwara abantu n’ibintu Muhammad Sidik Mia bose bazize Covid -19.
Iri tangazo ryashyizweho umukono n’umunyamabanga wa Perezida wa Malawa, Zanga Zanga G. Chikhosi rikomeza rivuga ko muri iyi minsi 3 , ibendera ry’igihugu rigomba kururutswa kugeza rwa gati mu rwego rwo guha icyubahiro aba ba Minisitiri n’abaturage ba Malawi muri Rusange bamaze gutwarwa ubuzima na Covid-19.
Kugeza uyu munsi muri Malawi hamaze kugaragara abantu 9,027 banduye Covid-19, mu gihe abagera ku 235 bamaze gupfa bazira iki cyorezo cyahagaragaye bwa mbere kuwa 3 Mata 2020.
Ildephonse Dusabe
