Umunyemari akaba n’umuherwe Elon Musk yeruye atangaza ko igihe kigeze ngo Sosiyete ya Microsof igezwe mu nkiko kuko yakoresheje amakuru ya Twitter mu mahugurwa kandi itabiherewe amakuru.
Uyu muherwe yemeza ko ashobora kujyana mu nkiko sosiyete ya Microsoft ayiziza amakosa yakoze yo gukoresha amakuru y’urubuga rwa Twitter mu mahugurwa, nta burenganzira iyo sosiyete yabiherewe, bityo ko nta mamvu yo kubitinza.
Musk wegukanye Twitter umwaka ushize ayiguze miliyari $44, yabitangaje ubwo yasubizaga umwe mu banditse kuri Twitter agaragaza ko Microsoft yatangaje ko igiye guhagarika gukoresha Twitter kubera ko habaye impinduka mu mabwiriza agenga urwo rubuga aho zimwe muri serivisi zarwo zisaba kwishyura mbere yo kuzikoresha.
Abinyujije kuri Twitter yagize ati “Bakoresheje amakuru ya Twitter mu mahugurwa nta burenganzira babifitiye. Igihe cyo kubarega kirageze.”
Ntabwo Musk yatangaje ubwoko bw’amakuru Microsoft yakoresheje, icyakora bikekwa ko ari ibijyanye n’ikoranabuhanga mu by’ubwenge bw’ubukorano, OpenAI muri porogaramu nka ChatGPT ya Microsoft.
Ntabwo biramenyekana niba koko Musk akomeje kuko atari ubwa mbere avuga ko azakurikirana abantu mu nkiko ariko ntabikore.
Microsoft iherutse gutangaza ko itazongera gutera inkunga Twitter guhera tariki 25 Mata 2023, ari nabwo Twitter yatangaje ko izatangira kwishyuza ibigo bikoresha ikoranabuhanga ryayo (Application Programming Interface) ryifashishwa mu guhererekanya amakuru hagati y’abantu benshi cyangwa babiri.
Ibigo bikomeye nka Microsoft bizajya byishyura $42,000 ku kwezi kugira ngo byemererwe gukoresha iryo koranabuhanga rya Twitter
Ibi nibiramuka bibaye byo iyi Sosiyete izaba ibaye iya mbere igejejwe mu rukiko kuva uyu muherwe yegukanye uru rubuga nkoranya mbaga.
