ONU ivuga ko M23 yinjiza $300,000 ku kwezi avuye mu bucukuzi bw’amabuye muri Rubaya ahwanye na miliyoni 400 z’amanyarwanda
Madame Bintou Keita ubwo yagezaga ijambo ku kanama k’umutekano ka ONU, i New York muri Amerika, ku itariki ya 30 Nzeri (9) mu mwaka wa 2024,,Bintou Keita yabwiye akanama k’umutekano ka ONU ko gakwiye gufatira ibihano “abungukira muri ubu bucuruzi bugize icyaha.
Intumwa yihariye y’umunyamabanga mukuru w’Umuryango w’Abibumbye (ONU) muri Repubulika ya Demokarasi ya Congo yavuze ko inyeshyamba za M23 zirwanya ubutegetsi bw’icyo gihugu zinjiza amadolari 300,000 y’Amerika ku kwezi avuye mu bucukuzi bw’amabuye y’agaciro mu gace ka Rubaya mu ntara ya Kivu ya Ruguru.
Mu ijambo yagejeje ku kanama k’umutekano ka ONU ku wa mbere, Bintou Keita yavuze ko gushinga imizi kw’ubutegetsi bwa M23 muri teritwari za Masisi na Rutshuru “byatumye ishobora kugenzura byuzuye umusaruro wa coltan” yaho.
Yavuze ko imitwe yitwaje intwaro mu burasirazuba bwa DR Congo yahindutse “abikorera bitwaje intwaro” imyinshi isigaye iriho ku buryo bwa Business.
Yagize ati: “Ubucuruzi buva mu gace ka Rubaya, bugereranywa ko butanga ibirenga 15% by’umusaruro wa tantalum ku isi, buha uwo mutwe witwaje intwaro amadolari [y’Amerika] agereranywa ko agera ku 300,000 buri kwezi, ayo agera kuri miliyoni 400 ku kwezi uyavunje mu mafaranga y’u Rwanda.
M23 yafashe Rubaya mu mpera ya Mata (4) uyu mwaka, nyuma y’imirwano ikaze n’ingabo za leta ya DR Congo,Rubaya icukurwamo amabuye y’agaciro akoreshwa cyane mu gukora ibikoresho bya elegitronike (electronic), nka telefone zigezweho na mudasobwa.
DR Congo ni yo icukurwamo tantalum ya mbere nyinshi ku isi. Amerika n’Ubumwe bw’Uburayi biyifata nk’ibuye ry’agaciro ry’ingenzi cyane.
