Umunya-Serbia Milutin Sredojevic ‘Micho’ yatangajwe nk’umutoza mushya wa Zamalek SC yo mu Misiri, aho biteganijwe ko kuri iki cyumweru Micho agera mu misiri gusinya amasezerano nyuma y’umunsi umwe avuye muri Orlando Pirates yo muri Africa y’epfo ku munsi w’ejo kuwa gatanu tariki 16 Kanama 2019.
Kuri uyu wa gatandatu nibwo Mortada Mansour umuyobozi w’iyi kipe yo mu misiri yatangaje ko Micho azayobora iyi kipe mu mikino mpuzamahanga y’amakipe yabaye aya mbere iwayo ndetse no mu mikino y’igikombe cy’igihugu n’ubwo bitaramenyekana neza igihe amasezerano hagati y’impande zombi azamara
Aganira n’itangazamakuru Mansour yavuze ko Milutin Micho azafatanya iyi imirimo na Tarek Yehia nk’umutoza wungirije wari ufite iyi kipe by’agateganyo, Aymar Abdelaziz kuri ubu ushinzwe guhuza ibikorwa by’iyi kipe, mu gihe uwitwa Amir Mordata agakomeza kuba umuyobozi ushinzwe umupira w’amaguru mu ikipe.
Nk’uko tubikesha ikinyamakuru cyandikirwa mu gihugu cya misiri, Milutin S. Micho yaje asimbura umutoza Khaled Gazal wasezerewe n’iyi kipe nyuma yo gutsindwa umukino iyi ikipe ya zamalek yatsinzwemo na mukeba Al ahly. Iyi kipe yifuje abatoza benshi b’amazina harimo na Ramòn Dìaz, Jaime Pacheco na Jesualdo Ferreira ariko ubuyobozi bwa Zamalek buhagarariwe na Mansour bwemeza Micho.
Abinyujijwe ku rukuta rwe rwa Twitter, Milutin yasezeye muri Orlando Pirates yari amazemo imyaka ibiri aho yayigezemo mu mwaka wa 2017. Gusa byaje kumenyekana ko yari impamvu zo kugirango yerekeze muri iyi kipe yo mu gice cy’amajyaruguru ya Afurika.
Micho yatandukanye na Orlando Pirates ayitoje imikino 80 atsinda imikino 38 anganya 26 atsindwa 16. Mbere yo kuza muri iyi kipe yaje avuye mu ikipe y’igihugu ya Uganda yatoje imyaka 4 nyuma yo gutoza ikipe y’igihugu y’ u Rwanda ‘Amavubi’ kuva mu mwaka wa 2011 kugeza muri 2013.
Milutin Micho w’imyaka 49, yageze yatangiye gutoza muri Africa mu mwaka wa 2001 aho yatozaga ikipe ya Villa SC yo mu gihugu cya Uganda, mbere yo guca mu makipe nka St George (Ethiopia), Yanga Africans (Tanzania), Al-Hilal (Sudan), Rwanda, Uganda na Orlando Pirates.
Yanditswe na HAKORIMANA Christian
