Minisitiri w’Ubutegetsi bw’igihugu Jean Marie Vianney Gatabazi yavuze ko umuturage uzajya ufasha inzego zibanze kuzitungira agatoki ku badohotse ku mabwiriza yo kwirinda icyorezo Covid-19 azajya ahabwa ishimwe.
Ibi Minisitiri Gatabazi yabitangarije RBA nyuma yo kubona ko hari abadohoka ku mabwiriza yo kwirinda iki cyorezo, ahanini bakabikora bakingiwe ikibaba n’abayobzi b’inzego zibanze.
Gatabazi yavuze ko Minisiteri y’Ubutegetsi bw’Igihugu yatangiye iperereza ku bayobozi b’inzego zibanze badashyira mu bikorwa ingamba zo guhashya iki cyorezo uko bikwiye, ayo yemeje ko uwo bazasanga atabikora uko bikwiye azajya akurwa ku mirimo ye.
Mu Rwanda imibare itangazwa na Mnisiteri y’ubuzima ivuga ko ku munsi w’ejo ku cyumweru tariki 27 Kamena 2021, abantu 9 barimo n’uruhinja rw’iminsi itanu bahitanwe n’icyorezo Covid-19. Uyu ukaba ariwo mubare munini w’abantu bapfuye ku munsi umwe kuva iki cyorezo cyagera mu gihugu kuwa 14 Werurwe 2020.
Iyi Minisiteri kandi igaragaza ko ku munsi w’ejo ku cyumweru tariki ya 27 Kamena 2021abantu 741 banduye iki cyorezo , bituma umubare w’abamaze kucyandura ugera ku 36,627. Umubare w’abakirwaye iki cyorezo uragera ku 9,117 ni mu gihe abo kimaze guhitana bangana 420.
