Imbuga nkoranya mbaga zitandukanye kuri uyu wa 23 Gicurasi zakwirakwije amakuru avuga ko Minisitiri wa siporo, Munyangaju Aurore Mimosa, yaba yatawe muri yombi, gusa ku mugoroba wo kuri uyu wa 23 Gicurasi yagaragaye ari gukurikirana mumukino wa Basketball muri Lycée de Kigali, bica amazimwe.
Uyu mu Minisitiri byavugwaga ko yatawe muri yombi bivugwa ko ngo yafashwe ubwo yakiriraga ruswa kuri hotel i Remera.
Umuvugizi wa RIB, Dr Murangira Thierry, yabajijwe kuri aya makuru, atangaza ko uru rwego rutigeze ruta muri yombi Minisitiri Munyangaju kandi ko nta cyaha na kimwe rumukurikiranyeho. Yagize ati: “Ni ibihuha. Nta Minisitiri wigeze ufatirwa muri hoteli.”
Mu masaa mbiri y’umugoroba, Minisiteri ya siporo yagaragaje ifoto irimo Minisitiri Munyangaju, isobanura ko yagiye gukurikirana umukino wa Basketball w’ikipe ya EspoirBBC na NBA Academy wabereye muri LDK.
Iyi Minisiteri yagize iti “Kuri uyu mugoroba, Minisitiri @AuroreMimosa ari kumwe na Anibal Manave Umuyobozi wa FIBA Africa, Victor Williams CEO wa @NBAAfrica, John Manyo-Plange VP wa @theBal, bitabiriye umukino uhuza ikipe ya Basket ya ESPOIR BBC na NBA Academy uri kubera muri LDK.”
Minisitiri Mimosa avuzweho iyi nkuru mu gihe umupira w’amaguru w’u Rwanda urimo ibibazo bitandukanye, birimo kuba ikipe y’igihugu Amavubi iherutse guterwa mpaga izira gukinisha umukinnyi wafatiwe ibihano no kuba abayobozi bo mu ishyirahamwe ry’uyu mukino, FERWAFA, baherutse kwegura.
Mu mafoto yagaragaye uyu mu minisitiri yari akurikiranye umukino nk’abandi bose.
