Umuyobozi wa Avega Agahozo, Mukabayire Valérie amaze gushyikiriza Minisitiri muri Perezidansi, Judith Uwizeye, irage Intwaza Nyirangoragoza Marianne witabye Imana, yasize ageneye Perezida Paul Kagame. Rigizwe n’ubutaka n’inzu biherereye mu Murenge wa Bushekeri w’akarere ka Nyamasheke.
Nyirangoragoza witabye Imana mu kwezi kwa 5 uyu mwaka yasize ageneye iri rage Perezida Kagame imbere y’umunyamategeko akaribitsa AVEGA kubera uburyo ngo yitaye ku mibereho ye nyuma y’ubuzima bubi yanyuzemo amaze kubura abana be 10 n’umugabo muri Jenoside yakorewe abatutsi.
Minisitiri Judith Uwizeye yavuze ko uwarazwe ari we Mukuru w’Igihugu yemeye iri rage kandi ko ubu butaka azabushyiraho igikorwa rusange kizagirira inyungu abaturage bahaturiye.
