Nyampinga w’u Rwanda wa 2017, Iradukunda Elsa ukurikiranyweho ibyaha bitandukanye birimo gukoresha inyandiko mpimbano, yafatiwe icyemezo cyo kurekurwa by’agateganyo.
Miss Iradukunda Elsa yasomewe icyemezo kuri uyu wa Gatatu tariki 25 Gicurasi 2022 ku cyacaro cy’Urukiko rw’Ibanze rwa Kicukiro.
Urukiko rwavuze ko Ubushinjacyaha bwagaragaje ko nubwo bwari bwaruregeye busaba ko Iradukunda afatirwa icyemezo cyo gufungwa by’agateganyo iminsi 30 ariko uregwa yaje gusaba imbabazi ndetse akagaragaza ubushake bwo gufasha ubutabera.
Ubushinjacyaha bwavuze kandi ko Iradukunda Elsa yasabye ko yarekurwa agakurikiranwa ari hanze, bityo ko Urukiko mu bushishozi bwarwo rwakwemeza iki cyifuzo.
Nyuma y’urubanza rwabaye kuri uyu wa Kabiri tariki 24 Gicurasi 2022, kuri uyu wa Gatatu tariki 25 Gicurasi, Urukiko rwemeje ko icyifuzo cy’uregwa gifite ishingiro, rutegeka ko arekurwa agakurikiranwa ari hanze.
Miss Iradukunda Elsa wari umaze ibyumweru bibiri n’igice atawe muri yombi n’Urwego rw’Igihugu rw’Ubugenzacyaha RIB, akurikiranyweho ibyaha birimo gutanga ubuhamya bw’ibinyoma ndetse no gukoresha inyandiko mpimbano.
Ni ibyaha bishingiye ku rwandiko yakoze rwanditse ubuhamya avugamo ko Ishimwe Dieudonne uzwi nka Prince Kid arengana ku byaha akurikiranyweho by’ihohoterwa rishingiye ku gitsina ryakorewe bamwe mu bakobwa bitabiriye Miss Rwanda.
RWANDATRIBUNE.COM
