Dosiye y’ikirego kiregwamo Iradukunda Elsa wabaye Miss Rwanda wa 2022, ndetse n’uwitwa Uwitonze Nasira, yamaze kugezwa mu Bushinjacyaha.
Urwego rw’Igihugu rw’Ubugenzacyaha (RIB) rumaze iminsi ruri gukurikirana aba bombi, rwashyikirije Ubushinjacyaha Dosiye y’ikirego cyabo.
Igikorwa cyo gushyikiriza Ubushinjacyaha iyi dosiye, cyabaye mu cyumweru gishize, ku wa Gatanu tariki 13 Gicurasi 2022.
Iradukunda Elsa na Uwitoze Nasira bakurikiranyweho ibyaha birimo icyo gutanga ubuhamya bw’ibinyoma, icyo koshya abitabajwe mu nzego z’ubutabera n’icyaha cyo ni uguhimba, guhindura inyandiko cyangwa gukoresha inyandiko mpimbano.
Miss Iradukunda Elsa yatawe muri yombi nyuma y’uko hagaragaye inyandiko ikekwa ko yanditswe na we, ivuga ko Ishimwe Dieudonne AKA Prince Kid nta hohotera yakoreye abakobwa bitabiriye Miss Rwanda mu gihe uyu musore akurikiranyweho ibyaha bifitanye isano n’iri hohoterwa.
Naho Uwitoze Nasira we yatawe muri yombi kuko yashyize umukono nka Noteri kuri iyi nyandiko mpimbano ya Miss Elsa aho bigararaga ko uyu mukono wa Noteri wagiyeho mbere y’umunsi umwe w’iyandikiweho iriya nyandiko.
RWANDATRIBUNE.COM
