Ku wa 14 no ku wa 15 Gicurasi nta murwayi mushya wa Coronavirus wabonetse ku butaka bw’u Rwanda,ibi byatumye umubare w’abayanduye uguma kuri 287, mu gihe uw’abayikize wiyongereyeho 13 maze baba 177.
Kuri uyu wa 15 Gicurasi Minisiteri y’Ubuzima itangaje ko nta murwayi mushya wa Coronavirus wabonetse mu bipimo 1058 byafashwe , mu gihe abantu icyenda basezerewe mu bitaro bituma umubare w’abamaze gukira ugera ku 177.
Mu Rwanda hamaze gufatwa ibipimo bingana na 46 198, hatahuwemo abantu 287 banduye; muri bo 177 ‘barimo icyenda bashya’ basezerewe mu bitaro nyuma yo gusuzumwa bagasangwa nta virusi bagifite mu mibiri yabo.
Kuva ku itariki ya 14 Werurwe 2020 ubwo hagaragaraga umurwayi wa mbere wa Covid19 ni ubwa mbere hashize iminsi ibiri ikurikiranye nta murwayi mushya uboneka mu bipimo bifatwa.
Mu bipimo 895 byafashwe ku wa Kane nabwo nta murwayi wasanganywe icyorezo cya COVID-19 giterwa n’agakoko gashya ka Coronavirus.
Kuri ubu ibitaro byita ku barwayi ba Coronavirus mu Rwanda biri kubarizwamo 110, bameze neza kuko nta n’umwe urembye.
kugeza ubu mu Rwanda indwara ya Covid19 ntawe iravutsa ubuzima.
Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 587 109 bamaze kuyandura ku Isi yose, barimo 306 119 yahitanye na 1 735 617 bamaze kuyikira.
UMUKOBWA Aisha
