Umuhungu wa Perezida Yoweri Kaguta Museveni, General Muhoozi Kainerugaba yavuze ko mu byumweru bicye azashyira hanze itangazo ridasanzwe.
Mu butumwa yanyujije kuri Twitter kuri uyu wa Mbere, General Muhoozi yavuze ko afite icyo ateganyiriza abantu mu minsi iri imbere.
Yagize ati “Mu byumweru bicye biri imbere, nzatangaza itangazo ry’ingenzi. Atari kuri Twitter ahubwo mu bundi buryo. Nzabikora ku giti cyanjye mu bushobozi bwanjye kandi nk’umuyobozi w’urungano rwacu.”
General Muhoozi Kainerugaba usanzwe ari Umujyanama wa Perezida Yoweri Museveni wa Uganda, akomeje kuvuga ko yamaze kuba umuyobozi w’ikiragano cy’ubu.
Yaboneyeho kandi gusubiza abibaza niba yifuza kuzaba Perezida wa Uganda, agasimbura Se Museveni.
Yavuze ko abatekereza ko yifuza kuba Perezida wa Uganda”ntibyigeze biba mu bitekerezo byanjye. Namaze kuba umuyobozi w’urungano.”
Yavuze ko kuba umuyobozi w’urungano ubwabyo bimuhagije kuko bimutera ishema n’icyubahiro bikomeye.
RWANDATRIBUNE.COM
