Kigali yihariye miliyoni 8 mu zisaga 9 zaciwe abanze kubahiriza amabwiriza yo kwirinda Covid19

Kuva aho mu Rwanda hagereye icyorezo cya COVID-19 giterwa na Coronavirus, hafashwe ingamba zitandukanye zo kwirinda ikwirakwira ryacyo, aho guhera mu mpera z’icyumweru gishize abaturage bose basabwe kuguma mu ngo.

Ibi byatumye hari abihutira guhaha byinshi byiganjemo ibiribwa ngo babe babifite mu ngo bityo abacuruzi bamwe bazamura ibiciro. Minisiteri y’ubucuruzi n’inganda (Minicom),ibicishije mu bitangazamakuru bitandukanye  yagaragaje ko yashyizeho  ubugenzuzi n’ibihano ku babikora ndetse ishyiraho ibipimo ntarengwa by’ibyo umuntu yemerewe guhaha.

Iyi Minisiteri yakoze igenzura mu Mujyi wa Kigali, mu Ntara y’Amajyepfo no mu Ntara y’Amajyaruguru, ireba ko amabwiriza yashyizeho yubahirizwa, isanga hari ukuzamuka kw’ibiciro mu buryo budasanzwe ku bicuruzwa byose byiganjemo ibiribwa, iby’isuku, no gukoresha iminzani itujuje ubuziranenge.

Yasanze kandi hari uguhisha ibicuruzwa mu bubiko hagamijwe kugaragaza ibura ryabyo ndetse no gutanga inyemezabuguzi zidahuye n’ibiciro byatangiweho ibicuruzwa.

Minicom igaragaza ko mu igenzura gusa ryakozwe kuva tariki 20 Werurwe kugeza tariki 25 Werurwe 2020, ku masoko no mu bice by’ubucuruzi bitandukanye mu Mujyi wa Kigali, Muhanga na Musanze, ibigo by’ubucuruzi byasanganywe ariya makosa byaciwe amande asaga miliyoni 4Frw.

Mu igenzura ryakozwe muri iriya minsi itandatu, mu Mujyi wa Kigali hagaragaye ibigo by’ubucuruzi n’abacuruzi 46 bazamuye ibiciro ndetse bikora n’andi makosa agamije gusahurira mu nduru muri iki gihe cy’icyorezo cya COVID-19.

I Musanze hagaragaye ibigo by’ubucuruzi n’abacuruzi 17 naho i Muhanga ni 46. Ibi bigo n’abacuruzi byose uko ari 109 byaciwe amande angana na 4 935 000Frw.

Minicom yerekana ko kuva tariki 17 Werurwe kugeza tariki 25 Werurwe 2020, imaze guhana ibigo by’ubucuruzi n’abacuruzi 90 mu Mujyi wa Kigali, baciwe amande angana na 7 550 000 Frw, mu Karere ka Musanze na Muhanga hamaze guhanwa abacuruzi 63, baciwe amande angana na 1 195 000Frw.

Bisobanuye ko kuva Minicom yatangira iri genzura, imaze guhana ibigo by’ubucuruzi n’abacuruzi 153, bakaba baraciwe amande angana na 8 745 000 Frw.

Minisitiri w’ubucuruzi n’inganda, Soraya Hakuziyaremye aherutse gutangaza ko ibiciro by’ibiribwa by’ibanze bitagomba guhinduka.

Yagize ati “Ibiciro by’ibiribwa by’ibanze ntibigomba guhinduka, ibyinshi nk’umuceri, ibirayi, imboga byose ni ibyo twihingira hano iwacu,…., Turasaba abafite amaduka, kuturiza ibiciro bitwaje iki cyorezo”.

Yakomeje asaba abaturage gutanga amakuru aho babonye iki kibazo “turasaba abaturage ko mu gihe habaho ko abacuruzi runaka bazamura ibiciro bitwaje ibi bihe bidasanzwe, kwegera inzego z’ibanze, kuko dufatanyije nazo ndetse n’ikigo cy’Igihugu gifite mu nshingano kurengera umuguzi mu kurwanya ibi.”

Minicom yasabye abacuruzi kwirinda kuzamura ibiciro by’ibicuruzwa byaba ibikorerwa imbere mu gihugu cyangwa ibiva hanze yacyo, kumanika ibiciro by’ibicuruzwa ku buryo bigaragarira abaguzi.

Hari kandi kwirinda gutanga inyemezabwishyu zidahwanye n’amafaranga bakiriye, kwirinda gukoresha ibipimo bitujuje ubuziranenge cyangwa gutanga ibicuruzwa byarengeje igihe no kwirinda kubangamira abagenzuzi b’ubucuruzi igihe baje babagana.