Imibare mishya igaragaza ko AMISOM yapfushije abasirikare 1587 yagezweho nyuma yo guteranya impfu 439 z’abasirikare bishwe mu 2012, kongeraho 1148 bishwe hagati ya 2014 na 2018.
Raporo yakozwe n’Ikigo Mpuzamahanga giharanira Amahoro, International Peace Institute (IPI) gifite icyicaro muri New York irashingira ku mibare iherutse gutangazwa na Afurika Yunze Ubumwe ku bikorwa byayo hagati ya 2014 na 2018.
Iyi mibare ikaba ituruka mu matangazo ya AMISOM ku basirikare yapfushije n’ubushobozi bukeya ifite bwo gushumbusha imiryango yabo hagati ya Kanama 2009 na Nzeri 2012 no kuva mu 2014 kugeza mu 2018.
Afurika Yunze Ubumwe ubusanzwe ntabwo itangaza amakuru ayo ari yo yose Ku basirikare ba AMISOM bishwe cyangwa bakomerekeye mu kazi. Icyemezo cyo gutanga aya makuru yakirekeye ibihugu bifite ingabo muri ubu butumwa.
Kugeza ubu ariko, ngo nta gihugu na kimwe gifite ingabo muri AMISOM kiragaragaza urutonde rusobanutse rw’abantu bacyo biciwe muri Somalia. Ariko nk’uko byemezwa na Paul D Williams wanditse iyi raporo ya IPI yashyizwe ahagaragara muri iki cyumweru, ngo imibare yizewe yakurwa muri raporo za Afurika Yunze Ubumwe zigaragaza neza amafaranga yishyuwe nk’impozamarira ku miryango y’abishwe n’abakuye ubumuga ku rugamba.
Ngo ugendeye rero ku mpozamarira zatanzwe hagati ya Kanama 2009 na Nzeri 2012, Dr Williams avuga ko AMISOM yapfushije abasirikare 439. Abagera kuri 22 bishwe mu 2009, 59 bishwe mu 2010, 298 bishwe mu 2011 na 60 bishwe mu 2012.
Imibare ya Afurika Yunze Ubumwe yo kuva muri Kanama 2009 kugeza muri Nzeri 2012, igaragaza kandi ko hishyuwe impozamarira ingana n’amadolari 50,000 ku bantu 439 bapfuye. Ngo hari andi y’inyongera agera muri 5,779,000 z’Amadolari yishyuwe nk’impozamarira ku bakomeretse, ugereranyije usanga buri musirikare mu basirikare 575 bakomeretse yaragiye ahabwa amadolari 10,000.
Mu mezi 37 uhereye muri Kanama 2009 kugeza muri Nzeri 2012, ubwo Afurika Yunze Ubumwe yasohoye abarirwa muri 27,729,000 z’Amadolari ku bapfuye n’abakomerekeye ku rugamba rwo kugarura amahoro muri Somalia. Muri rusange, ngo 79% by’amafaranga yasohowe ku mpozamarira ku bapfushije naho 21% agenda ku mpozamarira igenewe abakomeretse bikabaviramo ubumuga.
Raporo za Afurika Yunze Ubumwe ziheruka ku bikorwa byayo zasohotse muri 2017 na 2018 ariko, zigaragaza ko amafaranga yishyuwe nk’impozamarira ku miryango y’abapfushije n’abamugariye ku rugamba, yazamutse akava kuri miliyoni 27,729,000 z’Amadolari akagera kuri miliyoni 74,624,000 y’Amadolari hagati ya 2014 na 2018.
Ngo ugendeye kuri iyi mibare ugereranyije n’iya hagati ya Kanama 2009 na Nzeri 2012, ibi byaba bisobanuye ko 79% by’impozamarira yagiye ku bapfushije angana na miliyoni 58,952,960 z’Amadolari, naho 21% angana na miliyoni 15,671,040 akaba yarahawe abagize ubumuga .
Akabigira kabizi ni Uganda
Umuvugizi w’Igisirikare cya Uganda, Brig. Richard Karemire, Agira icyo avuga kuri raporo ya IPI. Avuga ko mbere yo kwemera kujya mu butumwa bwa AMISOM, UPDF yari izi ingaruka bishobora kugira ndetse ashimira imiryango y’abasirikare bitanze baharanira kugarura amahoro muri Somalia.
Ati: “Twari tuzi neza n’umutimanama ko kugarura amahoro n’ituze muri kiriya gihugu cy’ikivandimwe bitari kuzoroha kandi nta giciro.”
Ntubaze kandi ntugire icyo uvuga!
Muri raporo ya IPI, Dr Williams anenga politiki ya Afurika Yunze ubumwe yo kudatanga amakuru ku biciwe cyangwa abamugariye mu bikorwa bya AMISOM. Avuga ko ibi abishingira ku mpamvu ebyiri.
Iya mbere, ngo nuko ababungabunga amahoro bose bitanze ibyo bakoze bikwiye kumenyekana kandi ngo kutabikora bishobora gutuma ababo bahura n’ibibazo mu gihe basaba impozamarira baba bakwiriye.
Icya kabiri, ngo kudatangaza byinshi ku mpfu z’ababungabunga amahoro ni inyungu kuri Al Shabab yigarurira itangazamakuru igatangaza ibyo ishatse Afurika Yunze Ubumwe cyangwa AMISOM bitabasha kuyivuguruza.
Karegeya Jean Baptiste
