Musanze : Ku nshuro ya 4 Gitifu wa Kinigi afungiye kutubahiriza amabwiriza yo kwirinda Covid-19

Haribazwa niba Gitifu wa Kinigi wafatiwe mu kabari na Polisi mu gihe yarangiza igihano,hahita hashyirwa no mu bikorwa igifungo cy’imyaka 5 yakatiwe n’inkiko azira gukubita umuturage akamuvuna igufwa?

Umunyamabanga nshingwabikorwa w’umurenge wa Kinigi Twagirimana  Innocent ari mu maboko ya Polisi  ya Muhoza aho akurikiranweho amakosa yo  kutubahiriza amabwiriza yo kwirinda  icyorezo  cya Covid-19  nyuma y’aho afatiwe mu rugo rw’umuturage  utuye mu mudugudu  wa Mubuga, akagari ka Rwebeya mu murenge wa Cyuve bakahahindura akabari ijoro ryose.

Ni amakuru yizewe agera ku kinyamakuru Rwandatribune.com avuga ko uyu Gitifu Twagirimana Innocent ubwo  yari kumwe n’abapolisi 2  mu rugo rw’umugore witwa Maman Queen mu mudugudu wa Mubuga, akagari ka Rwebeya mu murenge wa Cyuve kuwa 11 Kanama 2021 mu masaha y’ijoro banywa inzoga, baje kugirana amakimbirane  bararwana ari nabyo byabaraburije.

Umuvugizi wa Polisi y’u Rwanda  CP John Bosco  Kabera kuri uyu wa gatandatu  , tariki ya 14 Kanama 2021 yabwiye  RBA ko muri kiriya cyumweru hafashwe abantu benshi harimo nabashoferi batwara ibinyabiziga  banyoye  abo bose batazihanganirwa.

Agira ati ” Nibyo muri iki cyumweru twafashe abantu batandukanye  barimo abayobozi, abatwara ibinyabiziga banyoye inzoga  n’abandi bingeri zitandukanye. Aba bose ntabwo Polisi izabihanganira , bagomba  gucibwa amande  ndetse n’abo ubwabo bakipimisha bagashyirwa mu kato  ariko na none abayobozi bavuga ngo  Polisi ibagaragaza ibateza ipfunwe mu bantu, siyo ibateza ipfunwe ahubwo nibo baryiteza  kuko batagiye muri ibyo bikorwa bibi ntaho bahurira na Polisi.”

Si ubwa mbere uyu Gitifu wa Kinigi Twagirimana Innocent agiriwe inama ubugira kenshi ariko ntiyisubireho  kuko nko ku itariki ya 13  Kanama 2020  ahagana saa sita na saa saba z’ijoro  ari kumwe n’abandi babiri bakoreye impanuka ikomeye mu kagari ka Mudenge, umurenge wa Shingiro  nabwo bakaba bari bavuye kunywa inzoga mu  murenge wa Busogo  , bityo bakaza gukora impanuka  nkuko bigaragazwa n’inzego z’umutekano zabatabaye  zikabajyana no mu bitaro bya Ruhengeri nkuko bigaragara mu butumwa bugufi Rwandatribune.com  ifitiye kopi.

Uko  iminsi yigiye imbere niko bakomeje  kwitabwaho n’abaganga  ariko  birangira borohewe  ari nabwo yasubiye mu kazi. Akigera mu kazi  yatangiye  kujya yirirwa mu baturage abaca  amande ngo baracuruza inzoga  kandi bibujijwe.

 Nkuko bigaragara mu nkuru y’umurengezi.com yo  kuwa 06 Gashyantare 2021 , bigaragara ko hari abaturage bamushinjaga kubaca amafaranga  ntabahe inyemeza bwishyu  ahubwo bamwe bakaba ngo baragendaga bamwoherereza amafaranga hifashishijwe ikorana buhanga ( Mobile Money) nkuko umwe muri bo babibwiye Umurengezi.com. Dore uko babivuze:

Nubwo bimeze gutya kandi uyu Gitifu wa Kinigi nubwo ari no mu kazi yakatiwe n’urukiko rwisumbuye rwa Musanze igihano cy’igifungo cy’imyaka 5 n’ihazabu ya miliyoni 5 ndetse n’indishyi z’ababararo zagombaga guhabwa umwana witwa Munyaziboneye Phocas yakubise akamuca igufwa ry’ikibero nk’uko bigaragara ku ifoto.

Gusa nkuko amategeko nshinjabyaha abishimangira , uwaburanye agatsindwa, ashobora kujurira  kandi akaguma mu buzima yararimo ari nabyo Gitifu yakoze none imyaka ibaye ibiri ubwo bujurire bwe butaraburanishwa ari nabyo abaturage bafitiye amakenga bakibaza n’ikibyihishe inyuma kikabayobera. Dore icyemezo cy’urukiko:

Ni  urubanza rwaburanishijwe tariki ya 21 Nyakanga 2020,  baregwagamo gukubita no gukomeretsa  ku bushake Munyaziboneye Phocas agacika igufa ry’ikibero. Ubushinjacyaha  buvuga ko iki cyaha cyakozwe ku itariki ya 11 Mata 2020

Mu isomwa ry’urubanza, urukiko rwagarutse ku myiregurire y’abaregwa baburanye bahakana icyaha ari nako bugaruka  ku mvugo z’abatangabuhamya n’ibimenyetso by’ubushinjacyaha birimo n’inyandiko ya muganga ( Expertise Medico-Legale) n’amafoto;

urukiko rwasanze abareganwa na Gitifu bose icyaha kibahama maze rubahanisha igifungo cy’imyaka itanu (5)  n’ihazabu ya Miliyoni eshatu (3.000.000 fw) kuri buri muntu.

Rwabategetse kwishyura Munyaziboneye Phocas  indishyi z’akababaro zingana na Miliyoni enye ibihumbi magana atatu mirongo inani na bibiri magana atandatu na makumyabiri ( 4.382.620 frw) no gufatanya kwishyura ibihumbi makumyabiri (20.000 frw)   y’amagarama y’urubanza  .

K’uruhande rw’abaregera indishyi,Nyina w’umwakubiswe agacibwa igufwa yabwiye Rwandatribune ko atishimiye itinzwa ry’urubanza kandi yaratsinze,ndetse bibaza impamvu uyu Gitifu yaba yarakiyobora abaturage kandi yarahamijwe ibyaha n’inkiko.

Setora Jeanvier