Umusaza w’imyaka 72 wo mu Kagari ka Nyarubuye mu Murenge wa Rwaza mu Karere ka Musanze, yahamijwe icyaha cyo gusambanya umukobwa ufite ubumuga bwo mu mutwe abanje kumushakashusha akamwinjiza mu nzu ye.
Uyu musaza yahamijwe icyaha yakoze tariki 10 Gashyantare 2022 mu masaha ya saa cyenda z’amanywa, agikorera mu Mudugudu wa Buhama, Akagari ka Nyarubuye, Umurenge wa Rwaza mu Karere ka Musanze.
Nkuko byasobanuwe n’Ubushinjacyaha, uyu musaza yashutse umukobwa ufite ubumuga bwo mu mutwe amujyana mu nzu amubwira ko agiye kumuha ibiryo aramukingirana, amukoresha imibonano mpuzabitsina ku gahato, aza gufatirwa mu cyuho na musaza w’uwo mukobwa nyuma yuko yari abonye ko mushiki we yagiye mu nzu y’uwo musaza agatindamo.
Bushingiye ku ngingo ya 134 y’itegeko No 68/2018 ryo ku wa 30/08/2018 riteganya ibyaha n’ibihano muri rusange, Ubushinjacyaha bwari bwasabiye uwo musaza igihano cy’imyaka 15 n’ihazabu ya miliyoni ebyiri.
Tariki 17 Nyakanga 2022 Urukiko rwisumbuye rwa Musanze rwasomye uru rubanza ruregwamo umusaza w’imyaka 72 icyaha cyo gukoresha imibonano mpuzabitsina ku gahato umukobwa w’imyaka 34 ufite ubumuga bwo mu mutwe.
Urukiko rwategetse ko uregwa afungwa imyaka 16 agatanga n’ihazabu ya miliyoni ebyiri (2 000 000frw).
RWANDATRIBUNE.COM
