Umwarimu wigisha mu Kigo cy’amashuri abanza cya Ostic International riherereye mu Murenge wa Nyagatare mu Karere ka Nyagatare, akurikirantweho gutera inda umwana w’imyaka 12 yarangiza akamushimuta akabanza kumunyuza kwa Mushiki we nyuma agahita amujyana muri Uganda.
Uyu mwana w’umukobwa yitwa Bagabo Reponse w’imyaka 12 wigaga mu mwaka wa 6 w’amashuri abanza, ababyeyi be bamubuze ku wa 09 Mutarama batanga amatangazo ku mbuga nkoranya mbaga, nyuma uyu mwana aza kuboneka mu gihugu cy’abaturanyi cya Uganda.
Urwego rushinzwe abinjira n’abasohoka rwa Uganda rukaba rwamushyikirije urw’u Rwanda nyuma umwana ahita ajyanwa mu Kigo cya Isange one stop center kugira ngo yitabweho.
Uyu mwana bivugwa ko uyu murezi yabanje kumujyana kwa mushiki we utuye mu Murenge wa Rwemasha mu Karere ka Nyagatare, Aho banamuhereye imiti yo gukuramo inda yari amaranye ukwezi kumwe.
Nyuma ngo baje kumujyana muri Uganda aho yahise afatwa n’umusore ukora akazi ko kuvunja amafaranga mu gace ka Kamwezi mu Kibanda mu Karere ka Rucyiga, na we ahita amushyikiriza ubuyobozi. Uyu mwarimu yatorotse kugeza na n’ubu aracyashakishwa n’inzego z’umutekano.
Umuhoza Yves
