Hon.Dr Habineza Frank akomeje gushimangira ko gufungira abaturage muri Transit Center binyuranyije n’amahame y’uburenganzira bwa Kiremwamuntu
Ishyaka DGPR ryanejerejwe n’ubwitabire bw’abaturage bo mu Karere ka Nyagatare ,kuri uyu wa gatatu tariki 26 Kamena 2024 mu mujyi muto wa Mimuri.
Dr Frank Habineza agisesekara ahabereye igikorwa cyo kwiyamamaza nk’umukandida ku mwanya wa Perezida yakiriwe n’abaturage batari bake maze bamutega yombi nawe yiva inyuma ku bigwi n’imigambi abafitiye nibamugirira icyizere bakamutora.
Dr Frank Habineza yasubiyemo ubugira kenshi ko azakuraho gufungwa iminsi 30 ndetse no gufungwa uzira ubusa nyuma ukarekurwa.
Yakomeje avuga ko azakuraho gufungirwa mu nzererezi ibyo bita transit
Bamwe mu bari bitabiriye kunva umukandida w’Ishyaka DGPR babwiye Rwandatribune ko bakiriye ibivugwa n’umukandida ku mwanya wa Perezida Dr Frank Habineza badusubiza aho bagize bati: turabyishimiye aramutse atowe agakuraho ikintu cya transit byaba ari byiza cyane.
Umuturage twahaye amazina ya Munyaneza utashatse ko amazina ye atangazwa yifuje ko Leta yazashyiraho uburyo bwo kubona uruhushya rwo gutwara ibinyabiziga bwa burundu bitagoye abaturage.
Mugenzi we wundi nawe ati: uyu mugabo ibyo avuga birumvikana ukurikije ibyo yakoze arashoboye rwose”.
Dr Frank Habineza asoza yatangarije abaturage b’akarere ka Nyagatare by’umwihariko abo mu murenge wa Mimuri ko abishimiye kandi ibyo abasezeranya atari amagambo gusa ko nibamutora azabagezaho ibyiza byakataraboneka.
Icyitegetse Florentine
Rwandatribune.com
