Leta Zunze Ubumwe za Amerika, Afurika y’epfo n’ibihugu byo mu muryango w’ubumwe bw’Uburayi (EU), byabaye bihagaritse gukingira abantu n’urukingo rwa Covid-19 rwo mu bwoko bwa Johnson & Johnson (J&J) nyuma yo kurukekaho gutera indwara yo kuvura kw’amaraso.
Abantu batandatu bagaragaje icyo kibazo mu bantu bahawe doze zirenga miliyoni 6.8, nkuko ikigo cy’Amerika kigenzura ubuziranenge bw’ibiribwa n’imiti (FDA) cyabivuze.Urukingo rwa Johnson & Johnson rwabaye ruhagaritswe mu muryango w’ubumwe bw’uburayi (EU), aho rwari rwatangiye gutangwa muri iki cyumweru.
Bikurikiye ibindi nk’ibi byabaye ku rukingo rwa AstraZeneca, bigatuma hagabanywa ikoreshwa ryarwo.
Ikigo FDA cyavuze ko kirimo kujya inama yo kuba ruhagaritswe nk'”uburyo bwo kwigengesera cyane”. Cyemeje ko umurwayi umwe yapfuye azize ibibazo byatewe no kuvura kw’amaraso, naho undi akaba arembye.
Abo bantu batandatu bose bagaragaweho kuvura kw’amaraso ni abagore bafite hagati y’imyaka 18 na 48, bagaragaza ibimenyetso by’uko kuvura hagati y’iminsi itandatu na 13 nyuma yo gukingirwa.
Bijyanye n’iyo nama yatanzwe n’ikigo FDA, ahakingirirwa hose muri Amerika bahagaritse gukoresha urwo rukingo kugeza harangiye iperereza ku mutekano warwo. Byitezwe ko za leta n’abikorera babikurikiza.
Kugeza ubu Amerika ni yo imaze gutangaza abantu ba mbere bensi ku isi banduye Covid-19, barenga miliyoni 31, n’abarenga 563,000 yishe, aba nabo bakaba ari bo ba mbere benshi ku isi.
Perezida w’Afurika y’epfo Cyril Ramaphosa ari mu banyafurika bakingiwe hifashishijwe urukingo rwa Johnson & Johnson rwakozwe n’Abanyamerika binyuze mu bigo byayo biba muri Reta Zunze Ubumwe z’Amerika na Janssen ikorera mu Bubiligi.
Bitandukanye n’izindi nkingo zimwe, J&j itangwa inshuro imwe kandi uru rukingo rushobora kubikwa ku bipimo by’ubushyuhe busanzwe bwo muri ‘frigo’. Ibi bituma byoroha cyane kurugeza ahantu hashyushye cyane cyangwa hagoye kugera.
Mu gihe ibihugu byinshi byamaze gutumiza za doze zarwo zibarirwa muri za miliyoni, mu bihugu bicye ni ho rwemejwe ko rwakoreshwa.
Muri Amerika rwahawe uruhushya rwo gukoreshwa ku itariki ya 27 Gashyantare 2021 ariko inkingo za Pfizer-BioNTech na Moderna ni zo kugeza ubu zikoreshwa cyane.
Urukingo rwa J&J rwahawe abantu bagera hafi kuri miliyoni zirindwi muri Amerika, bangana na 3% by’abamaze gukingirwa kugeza ubu.
Afurika y’epfo – igihugu cya mbere cyatanze uru rukingo – na yo yahagaritse ikoreshwa ryarwo, nubwo nta kuvura kw’amaraso kwari kwatangazwa muri icyo gihugu.
Urwo rukingo rwari rwabaye urukunzwe cyane muri icyo gihugu nyuma yuko ubushakashatsi bugaragaje ko rutanga ubwirinzi buri hejuru cyane kurusha izindi nkingo ku bwoko bushya bwa Covid-19 bwagaragaye muri Afurika y’epfo.
Kuva hagati mu kwezi kwa kabiri, abantu hafi 300,000 bakora mu rwego rw’ubuvuzi bamaze kuruhabwa muri icyo gihugu.
Ishami ry’umuryango w’abibumbye ryita ku buzima (OMS) ryabwiye ibiro ntaramakuru Reuters ko ririmo kugenzura uko ibintu bihagaze kandi ritegereje guhabwa raporo n’ibigo by’ubugenzuzi bw’imiti byo muri Amerika n’Uburayi.
