Umutwe wa M23 nyuma yo gufata agace ka Kisharo, watangaje ko ubu uhanze amazo agace ko mu misozi gaherereye mu bilometero bitatu uvuye mu gace ka Nyamilima.
Agace ka Kisharo gaherereye muri Gurupoma ya Binza muri Teritwari ya Rutshuru mu Ntara ya Kivu ya Ruguru, kafashwe n’abarwanyi ba M23 ku wa Mbere w’iki cyumweru tariki 02 Mutarama 2022.
Ni agace kafashwe n’uyu mutwe nyuma y’urugamba rukomeye warwanyemo na FARDC ndetse n’abambari bayo yiyambaje aho ku wa Mbere hari haramutse humvikanamo urusaku rw’amasasu.
Uyu mutwe watangaje ko “Nyuma ya Kisharo, M23 ikomeje guhangana n’umwanzi yerecyeza Nyagahinga mu misozi iri mu bilometero 4 uvuye Buramba ndetse na bitatu uvuye mu mujyi wa Nyamilima.”
Uyu mutwe waboneyeho kuburira inyeshyamba z’imitwe yiyemeje gutera ingabo mu bitugu FARDC ko yazibukira ndetse uvuga ko umujyi wa Nyamilima ugiye na wo gufatwa n’uyu mutwe wa M23.
RWANDATRIBUNE.COM
