Nyuma yuko umunyapolitiki Moise Katumbi atangaje ko aziyamamaza mu matora y’Umukuru w’Igihugu muri Repubulika Iharanira Demokarasi ya Congo, abamushyigikiye ibihumbi n’ibihumbi bahise birara mu mihanda bamwamamaza ngo ko ari we ukwiye kuyobora iki Gihugu.
Uyu munyapolitiki Moise Katumbi usanzwe ari n’umuherwe ukomeye muri Congo Kinshasa, aherutse gutangaza ko yamaze kwitandukanya n’Ihuriro Union Sacrée rishyigikiye Perezida Tshisekedi, kugira ngo aziyamamaze mu matora y’umwaka utaha.
Moise Katumbi yagize ati “Ngendeye ku bushake bwo gukorera Abanyekongo, nafashe icyemezo cyo kuva muri Union Sacrée, nemeza ko nzatanga kandidatire yanjye mu matora y’umukuru w’Igihugu.”
Nyuma yuko atangaje ibi, Abanyekongo basamiye hejuru iyi nkuru, bahita bagaragariza uyu munyemari ko bamushyigikiye ndetse ko bifuza ko azasimbura Tshisekedi bashinja kuzambya Igihugu.
Amashusho yashyizwe hanze kuri uyu wa Mbere tariki 19 Ukuboza 2022, Abanyekongo benshi biganjemo urubyiruko bari biraye mu mihanda, bambaye imipira iriho amaforo ya Moise Katumbi, bavuga ko bamushyigikiye.
Ibi bikorwa bisa nk’imyigaragambyo imaze kumenyerwa muri Congo, yabaye kuri uyu wa Mbere tariki 19 Ukuboza 2022, kuva saa kumi z’umugoroba (16:00’) kugeza saa mbiri na cumi n’itanu z’ijoro (20:15’).
RWANDATRIBUNE.COM
