Ishami ry’Umuryango w’Abibumbye ryita ku Buzima (OMS), ryagaragaje impungenge ku bwiyongere bw’ibinini bya baringa byo mu bwoko bwa ’Ozempic’ ubundi bikoreshwa n’abarwaye diabète, ariko bikaba bikomeje kugurwa ku bwinshi n’abashaka kunanuka mu buryo bwihuse.
Kuwa 20 Kamena 2024 OMS yatangaje ko ibi binini bya baringa byagaragaye ku isoko rya Brésil, u Bwongereza, ndetse na Leta Zunze Ubumwe za Amerika, ndetse bikaba byarakomeje kwiyongera kuva muri 2022.
Umuyobozi Mukuru Wungirije ushinzwe iby’Imiti muri OMS, Dr. Yukiko Nakatani, yatanze umuburo ku bo mu rwego rw’ubuzima, abagenzura imiti ndetse n’abaturage muri rusange, abasaba kuba maso bakagenzura neza iyo miti kugira ngo babashe kuyitandukanya.
Mu bihe bitandukanye kandi OMS yari yaragiye itanga impuruza no ku kuba abarwaye diabète bakomeje kubura umuti wa Ozempic ku isoko, n’ubundi bigizwemo uruhare n’abagiye bawamamaza ko ufasha mu kugabanya ibiro, abashaka kunanuka batangira kuwugura ku bwinshi.
Ibi ni byo bikekwa ko inganda zimwe zabaye za rusahurira mu nduru zitangira kuwukora ziwigana, ibiri gutuma haboneka ubwiyongere bw’uwa baringa ku isoko.
Rwandatribune.com
