Nk’uko bitangazwa n’Ibiro Ntaramakuru by’Abafaransa, AFP, ngo Callixte Mbarushimana wahoze ari umukozi wa Loni mu Rwanda wari ukurikiranwe n’ubutabera mu Bufaransa kubera uruhare ashinjwa kugira muri Jenoside yakorewe Abatutsi mu 1994, ntagikorwaho iperereza kubera kubura ibimenyetso. Amaze imyaka 20 nk’impunzi ya politiki mu Bufaransa.
Inzego z’ubutabera z’u Bufaransa zarangije ibikorwa byazo kuri Callixte Mbarushimana. Mu cyemezo cyo ku itariki ya 1 Ukwakira, umucamanza w’iperereza wo mu ishami ry’ibyaha byibasiye inyoko muntu ry’urukiko rw’ubucamanza rwa Paris, yanzuye ko “nta rubanza rwo kuburana, hakurikijwe icyifuzo cy’ubushinjacyaha, nyuma yo gusesengura ibimenyetso.”
Yavuze ko ibyo aregwa bidahagije kugira ngo ashyikirizwe urukiko mpanabyaha. Yagaragaje cyane cyane ubuhamya butandukanye bwakusanyirijwe hamwe, “buhindagurika,” kandi “budasobanutse” bihagije, kandi “budahura” bihagije.
Callixte Mbarushimana, ubu ufite imyaka 61, kuva mu 2010 aregwa ibyaha byibasiye inyokomuntu n’ubufatanyacyaha, arashinjwa n’amashyirahamwe menshi n’abarokotse mu Rwanda kuba yaragize uruhare mu bwicanyi, kuba yarakoze urutonde rw’Abatutsi bagomba kwicwa no kuba yarahaye izari Ingabo z’u Rwanda n’Interahamwe ibikoresho bivuye muri UNDP, ishami ry’Umuryango w’Abibumbye yakoreraga icyo gihe.
ishyirahamwe rya collective of civil parties for Rwanda rifite icyicaro mu Bufaransa ryahise ritangaza ko rizajuririra iki cyemezo.
Iri shyirahamwe riratangaza ko Mbarushimana
yakurikiranwe mbere n’Urukiko Mpuzamahanga Mpanabyaha mu mwaka wa 2010, kuri iyi nshuro ku byaha byakorewe mu 2009 muri DRC igihe yari Umunyamabanga Nshingwabikorwa wa FDLR, ariko nabwo ntiyaburanishwa, kubera kubura ibimenyetso.
Mu Bufaransa, iri shyirahamwe ryatangaje ko ryajuririye iseswa ry’urubanza ry’inkiko. Kuri ryo, iperereza ryatumye iki cyemezo gifatwa ubwaryo ntabwo ryuzuye: “ibirego rusange bivuga ko abatangabuhamya bamwe batigeze bumvwa kandi ko amakuru ari muri raporo y’iperereza ry’Umuryango w’Abibumbye atigeze agenzurwa”.
Aganira na AFP, Umwunganizi wa Callixte Mbarushimana, Laurence Garapin, yibukije ko umukiriya we “yahoze atangaza ko ari umwere”
