Michael Avanyo, Umushumba mukuru wa Gethsemane Prayer Ministry rikorera ubutumwa mu gace ka Suhum mu gihugu cya Ghana yaciwe amande angana na GHC1,200 cyangwa igifungo cy’amezi atatu azira kwituma no gukwiza amazirantoki mu nzu ye .
Inkuru ya Africanews24 ikomeza ivuga ko Micheal Avanyo ushinjwa kumena imyanda y’abantu mu nzu ye yiyemereye icyaha , urukiko rumushinja ko yasuzuguye gasopo yari yahawe n’urwego rushinzwe ibidukikije muri ako gace rwari rwamusabye gukemura ikibazo cy’umwanda cyamuvugwagaho.
Umushinjacyaha yavuze ko abaturanyi b’uyu mushumba bahoraga bamutangira amakuru ko iwe haba umwanda ukabije byageze aho ubabangamira, gusa ngo ubuyobozi bwibanze bwajyaga kumubwira ngo yikosore ntagire na kimwe ahindura.
Umuyobozi w’urukiko rw’ibanze rwa Suhum, Cynthia Blagoggee atazuyaje yahise amusaba guhitamo kimwe mu bihano bitatu aribyo : Gufungwa amezi atatu, gukora imirimo nsimburagifungo, no kwishyura amande angana na 1200 mu mafaranga akoreshwa muri iki gihugu.
Michael Avanyo yahisemo kwishyura amande y’1200 cyamafaranga akoreshwa muri Ghana [angana na 203,041.19 mu mafaranga y’u Rwanda]. Ndetse asezeranya urukiko ko agiye kunoza isuku yo mu rugo rwe .
