Umukinnyi wo mu ikipe ya Juventus, Paul Pogba ashobora guhagarikwa imyaka ine nyuma y’uko bigaragaye ko yakoresheje imiti yongerera imbaraga mu mubiri we nk’uko byagaragajwe n’ibipimo byafashwe ku nshuro ya kabiri.
Ibi byatangajwe, nyuma y’umukino Juventus yatsinze Udinese 3-0 muri Kanama, Ikigo cy’Igihugu gishinzwe kurwanya Ibiyobyabwenge (NADO), cyatoranyije bamwe mu bakinnyi ba Juventus kugira ngo bapimwe hagamijwe kureba ko bakoresha ibiyobyabwenge, hagaragaramo na Pogba utari wakinnye uwo mukino.
Ibisubizo byagaragaje ko Pogba akoresha imiti imwongerera imisemburo ya “testosterone” yongera imbaraga, ahita ahagarikwa by’agateganyo ariko ahabwa iminsi itatu yo gutanga ibindi bipimo hagasuzumwa neza koko niba ari byo.
Ku nshuro yakurikiyeho, ibipimo byongeye kugaragaza ko yakoresheje iyo miti ndetse mu gihe byakomeza kumuhama yahabwa ibihano by’umupira w’amaguru harimo no guhagarikwa igihe kirekire.
Uyu mugabo w’imyaka 30 agomba gukomeza gukora ibishoboka byose agasobanura uko iyo misemburo yageze mu mubiri we atabigizemo uruhare nk’uko ushinzwe kureberera inyungu ze, Rafaela Pimenta, avuga ko “ntiyigeze agira uruhare mu kurenga ku mategeko.”
Uyu Mufaransa aramutse ahamwe n’ikoreshwa ry’imiti yongera imbaraga rihanwa n’amategeko muri ruhago, yakongererwa ibihano birimo kumara imyaka ine adakandagira mu kibuga.
Testosterone ni imisemburo isanzwe ya kigabo ariko ishobora kongerwa hifashishijwe imiti. Bikorwa kenshi ku bakinnyi kugira ngo biyongerere imbaraga. Usibye guhagarikwa imyaka ine, iyo abihamijwe n’amategeko bishobora no kumuviramo kudasubira mu mukino burundu.
Muri Nyakanga 2022 ni bwo Pogba yasubiye muri Juventus amaze gusoza amasezerano ye muri Manchester United, ahita asinya imyaka ine nubwo yatangiranye imvune zikomeje gutuma atitwara neza.
Pogba amaze gukina iminota 51 gusa muri uyu mwaka w’imikino kuko yagaragaye ku mukino wa Bologna na Empoli nabwo yinjiye mu kibuga ari umusimbura.
Umusaruro w’uyu mukinnyi nturi ku rwego rushimishije kuko usubije amaso inyuma ukareba no mu mwaka ushize, yakinnyemo iminota 108 mu mikino itandatu ya Shampiyona, atanga umupira umwe wavuyemo igitego.
Uwineza Adeline
