Umukuru w’Igihugu cy’u Rwanda, Paul Kagame yageze muri Kenya aho yitabiriye irahira rya William Ruto uzarahirira kuyobora Kenya kuri uyu wa Kabiri.
Ku gicamunsi cyo kuri uyu wa Mbere tariki 12 Nzeri 2022, Ibiro by’Umukuru w’u Rwanda, byatangaje ko Perezida Kagame Paul yageze i Nairobi muri Kenya aho yitabiriye umuhango w’irahira rya William Ruto watsindiye kuyobora Kenya muri manda ye ya mbere.
Perezida mushya wa Kenya, William Ruto yahise yakira mugenzi we Paul Kagame, bagirana ibiganiro byagarutse ku mubano usanzwe hagati y’Ibihugu byombi.
William Ruto yavuze ko u Rwanda na Kenya, ari Ibihugu bisanzwe bifitanye umubano mwiza udashingiye gusa ku kuba biherereye mu karere kamwe ahubwo no ku nyungu zihuriweho n’Ibihugu byombi.
William Ruto yaboneye kwizeza ko imiyoborere ye izarushaho gukorana n’iy’u Rwanda mu rwego rwo kuzanira inyungu abatute ibi Bihugu byombi bisanzwe binahuriye mu Muryango wa Afurika y’Iburasirazuba.
RWANDATRIBUNE.COM
