Nyuma y’umukino muto wa Tennis Perezida Kagame yakiniye ku mihanda (Road Tennis) isanzwe imenyerewe gukinirwamo umukino wa Tennis muri Barbados , aho ari mu ruzinduko rw’akazi , yahawe impano ya ‘racquets’ ebyiri zihariye zisanzwe zikoreshwa muri uyu mukino.
Amafoto y’ Umukuru w’Igihugu akinira Tennis ku mihanda (Road Tennis) isanzwe imenyerewe cyane muri iki gihugu ,yasohotse ku munsi w’ejo hashize Tariki ya 16 Mata 2022.
Amakuru dukesha Village Urugwiro avuga ko ubwo Perezida Kagame yari mu rugendo na Minisitiri w’Intebe wa Barbados, Mia Mottley bageze ahazwi nka ‘Bush Hall Community Centre’ bahitamo kuhahagarara, Perezida Kagame ajya gukina iyi Tennis yo ku muhanda n’abasaza bari bahari.
Perezida Kagame ubwo yakinaga iyi Tennis, abo bari kumwe barimo Mia Mottley, Umuyobozi Mukuru w’Urwego rw’Igihugu rw’Iterambere, Clare Akamanzi na Minisitiri w’Imari n’Igenamigambi, Dr Uzziel Ndagijimana bari bicaye bareba uko umukino ugenda.
Tennis yo ku muhanda ni umukino ukunzwe cyane muri Barbados cyane ko ariho yatangiriye mu 1930. Uyu mukino watangijwe n’abaturage babayeho biciriritse kuri iki kirwa bitewe n’uko batari bafite ubushobozi n’amikoro yo gukina Tennis isanzwe.
Mu biyitandukanya na Tennis isanzwe harimo ko ikinirwa ku kibuga gito ndetse hakanakoreshwa ’racquets’ nto.
Ejo hashize nibwo Perezida Kagame yageze i Barbados nyuma yo kuva mu gihugu cya Jamaica.
Uwineza Adeline
