Mu gitondo cyo kuri uyu wa Gatandatu tariki ya 27 Werurwe 2021 Perezida Museveni na Madamu bari baherekejwe n’abakora mu biro bya Perezida bakingiwe Covid-19 mu gikorwa cyabereye mu gace ka Nakasero.
Ibiro bya Perezida wa Uganda byatangaje ko Museveni na Madamu we Janet Museveni batewe urukingo rwo mu bwoko bwa Oxford AstraZeneca rumwe muzageze muri iki gihugu biciye mu mushinga Covax.
Mu butumwa Museveni yatangaje amaze gukingirwa yagize ati“Uyu munsi, njye na Madamu Janet Museveni twabonye urukingo rwa Covid-19. Ndashishikariza Abagande bose bujuje ibisabwa kugira ngo bakingwe kugana ibigo nderabuzima kandi bagakomeza kwitwararika no gukurikiza amabwiriza asanzwe arimo kwambara agapfukamunwa ,gukaraba intoki no guhana intera “
Museveni n’umugore we bakingiwe n’umunyamabanga Uhoraho muri Minisiteri y’Ubuzima Dr Diana Atwine.
Dr Atwine yashimye Museveni na Madamu ko babaye intangarugero mu gutinyura Abanya-Uganda bari bakomeje kutizera uru rukingo ndetse anasaba ko abo bireba bose basabwe kuza kwikingiza mu maguru mashya.
Guverinoma ya Uganda yakiriye inkingo zigera ku bihumbi 800 binyuze muri gahunda ya Covax ihuriweho n’ibihugu bya Afurika birimo n’u Rwanda.
Perezida Museveni abaye uwa Gatatu mu bakuru b’ibihugu bya Afurika y’Iburasirazuba bikingije Covid-19,nyuma ya Uhuru Kenyatta wa Kenya na Paul Kagame w’u Rwanda.
.
