Umukuru w’Igihugu cy’u Rwanda, Paul Kagame yashimiye Liz Truss watorewe kuba Minisitiri mushya w’Intebe w’u Bwongereza, umwanya asimbuye Boris Johnson uherutse kwegura kuri izi nshingano.
Mu butumwa yanyujije kuri Twitter ye, Perezida Paul Kagame yifurije ishya n’ihirwe Madamu Liz Truss watsinze amatora y’umusimbura wa Boris Johnson ku mwanya wa Minisitiri w’Intebe w’u Bwongereza.
Perezida Kagame yasezeranyije Liz Truss imikoranire igamije kongerera ingufu umubano n’imikoranira hagati y’Ibihugu byombi.
Yagize ati “Tuzakomeza kongerera imbaraga umubano mwiza usanzwe uri hagati y’u Bwongereza n’u Rwanda kandi tukwifurije ibyiza.”
Perezida Kagame ni we uyoboye Umuryango w’Ibihugu bikoresha icyongereza uzwi nka Commonwealth aho izi nshingano yazihawe mu nama y’Abakuru b’Ibihugu bigize uyu muryango yabereye mu Rwanda muri uyu mwaka.
RWANDATRIBUNE.COM
