Biteganyijwe ko Perezida Felix Tshisekedi ari bwiyamamarize mu mujyi wa Goma kuri iki cyumweru tariki 10 Ukuboza, n’ubwo hari bamwe bari batangiye gutekerezako ashobora kubisubika kubera umutekano muke uri muri icyo gice cya Kivu y’amajyaruguru.
Amakuru ava muri Congo aremeza ko Felix Tshisekedi ari bwiyamamarize muri Stade ya Afia,aho benshi mu bakongomani bifuza kumva icyo avuga ku bibazo by’umutekano muke.
Byitezwe ko ashobora kuza gukomeza kwikoma umutwe wa M23 wafashe ibice bitandukanye muri Kivu y’amajyaruguru, cyane ko yavuze ko atazaganira n’uwo mutwe, ko ahubwo agomba kunyura mu nzira y’imirwano.
Mu mbwirwaruhame akomeje kuvuga mu kwiyamamaza kwe, akomoza ku gihugu cy’u Rwanda avuga ko ashobora kugishozaho intambara, ngo kuko aricyo cyaba cyihishe inyuma y’umutwe wa M23, ibintu u Rwanda rwakomeje guhakana rwivuye inyuma.
