Umukuru w’igihugu cya Congo Perezida Tshisekedi yasabiwe gukurwa k’urutonde rw’abaziyamamariza kuyobora iki gihugu bamushinja ko yatanze imyirondoro irimo amanyanga n’uburiganya.
Iki kirego cyatanzwe na Seth Kikuni Masudi nawe uri mu biyamamariza kuyobora Repubulika Iharanira Demokarasi ya Congo (RDC), akaba yagejeje ikirego cye m’urukiko rushinzwe kurinda Itegeko Nshinga, asaba ko kandidatire ya Perezida Felix Tshisekedi iteshwa agaciro.
Seth Kukini yavuze ko imyirondoro Tshisekedi yatanze muri Komisiyo y’Amatora nk’umwe mu biyamamaza irimo amanyanga kuko idahuye n’iyo yatanze mu 2018.
Uyu mugabo kandi yagaragaje ko mu mwaka wa 2018 ubwo Tshisekedi yiyamamazaga, yatanze imyirondoro ivuga ko yitwa Tshisekedi Tshilombo Felix, nyamara kuri iyi nshuro iyo yatanze ngo ni Tshisekedi Tshilombo Félix-Antoine.
Mu buryo bw’amategeko, Kikuni yavuze ko abo ari abantu babiri batandukanye, bityo ko kandidatire idakwiriye kwemerwa.
Si Tshisekedi usabirwa gutesha agaciro kandidatire ye gusa kuko na Moïse Katumbi Chapwe ushinjwa kuba umunyamahanga nawe ariko biri.
Mu batanze ikirego basabira Katumbi gukurwa mu mubare w’abaziyamamariza kuyobora RDC, harimo Noel Tshiani na we wiyamamariza kuyobora Congo, wanamenyekanye kubera umushinga w’Itegeko yatanze usaba ko kwemererwa kuyobora muri Congo ugomba kuba ufite so na nyoko bahavuka.
Komisiyo y’Amatora muri Congo iherutse gutangaza urutonde rw’agateganyo ruriho abakandida 24 baziyamamaza mu matora ya Perezida ateganyijwe mu Ukuboza 2023.
Aya matora yavuzweho byinshi k’uburyo hari n’abataratinye kuvuga ko aya matora atazigera aba kubera ko Perezida Tshisekedi ari gushakisha uburyo yasubiokwa yifashishije intambara.
Umuhoza Yves
Rwanda Tribune.com
