Perezida Tshisekedi yazamuye mu ntera bamwe mu ba Jenerali ba FARDC

Umukuru w’igihugu cya Repubulika ya Demokarasi ya Congo, akaba n’umugaba w’ikirenga w’ingabo za  Congo, Félix Tshisekedi yakoze impinduka mu Gisirikare azamura mu ntera  bamwe mu ba Jenerali barimo  Tshiwewe Songesa Christian.

Uyu mukuru w’igihugu  cya Congo, yazamuye  mu ntera Tshiwewe Songesa Christian wahoze ari Liyetona Jenerali amuha ipeti risumba andi mapeti yose y’ingabo za Congo, amugira  Jenerali.

Ychlingonza Nduru Jaques,we yavuye ku ipeti rya  Gen Major ahabwa irya Lieutenant General

Kasonga Cibangu Leon Richard wari General Major  nawe yazamuwe mu ntera ahabwa  ipeti rya Lieutenant General.

Eddy Kapend Yrung wari Colonel we yagizwe General de Brigade. Uyu Eddy Kapend asanzwe ari mu byara wa Laurent – Desire Kabila wahoze ari Perezida wa Congo ndetse akaba n’umwe mu bajyanama be ba hafi.

Nyuma y’urupfu rwa Laurent Kabila wishwe arashwe n’umwe mu basirikare bari bashinzwe kumurinda, Eddy Kapend ari mu basirikare 30 batawe muri yombi icyo gihe, bashinjwa kugira uruhare mu rupfu rwe, mbere yo gukatirwa urwo gupfa.

Perezida Tshisekedi yamuzamuye mu ntera anamusubiza mu Gisirikare cya Congo,  nyuma yo kumuha imbabazi muri Mutarama 2021 we n’abagenzi be 23 bari bafunganwe.

Eddy Kapend n’abagenzi be bafunguwe nyuma y’imyaka 20 bari bamaze muri gereza.

Abakurikiranira hafi ibya Politiki, bavuze ko Perezida Tshisekedi yazamuye aba ba Jenerali mu ntera mu rwego rwo kwitegura intambara Congo ishaka kugaba ku Rwanda.

Uwineza Adeline

Rwandtribune. Com