Perezida Paul Kagame yakiriye perezida wa Madagascar Rajoelina kuri uyu wa mbere, muri village Urugwiro, bagirana ibiganiro by’ibanga. Rajoelina ari mu Rwanda kuva ku cyumweru taliki 6 Kanama ,mu ruzinduko rw’iminsi 3, aho byitezwe ko hari byinshi ashaka kwigira ku Rwanda.
Ni uruzinduko yatumiwemo na mugenzi we perezida Paul Kagame nyuma yuko na we yasuye Madagascar muri 2019. Rajoelina yakiriwe neza ageze mu gihugu cy’u Rwanda, ndetse yahise ashimira uburyo yakiriwe.
Mu biganiro bitandukanye abakuru b’ibihugu byombi bari bugirane, byitezwe ko, nyuma yabyo biza gukurikirwa n’umuhango wo gusinya amasezerano y’ubufatanye hagati y’u Rwanda na Madagascar.
Perezida Rajoelina mu butumwa yacishije ku rukuta rwe rwa twitter ,yagaragaje uburyo yakiriwe mu Rwanda, mbere yo kugaragaza u Rwanda nk’icyitegererezo mu iterambere rya Africa.
NIYONKURU Florentine.
