Prince Kid ukurikiranyweho ibyaha birimo guhoza undi ku nkeke biganisha ku mibonano mpuzabitsina, yagarutse imbere y’Urukiko rwahise runapfundikira urubanza rwe.
Nyuma yuko urubanza rw’uyu musore rusubijwe inyuma, ndetse rugasubikwa inshuro ebyiri, kuri uyu wa Gatanu tariki 25 Ugushyingo 2022, rwaburanishijwe.
Rwongeye kuburanishwa mu muhezo ndetse n’abatangabuhamya bifujwe ko kumvwa n’Umucamanza, bumvwa barindiwe umutekano.
Prince Kid wari waje mu rubanza mu gitondo cyo kuri uyu wa Gatanu saa mbiri zirengaho iminota micye, yaburanye mu gihe gikabakaba mu masaaha abiri, urubanza rwahise rupfundikirwa, Urukiko rwemeza ko ruzasoma icyemezo cyarwo tariki 02 Ukuboza 2022.
Uyu musore uyobora komanyi ya Rwanda Inspiration Backup yahoze itegura irushanwa rya Miss Rwanda, akurikiranyweho ibyaha bishingiye kuri ruswa y’igitsina bivugwa ko yatse bamwe mu bakobwa bitabiriye iri rushanwa mu bihe bitandukanye.
RWANDATRIBUNE.COM
