Urukiko Rwisumbuye rwa Nyarugenge rwatangiye kuburanisha ubujurire bwa Ishimwe Dieudonne wajuririye icyemezo cyo gufungwa by’agateganyo, mu rubanza rwabereye mu muhezo.
Prince Kid wamaze kwambara impuzankano y’imfungwa n’abagororwa y’iroza, yageze ku kicaro cy’Urukiko Rwisumbuye rwa Nyarugenge mu gitondo cyo kuri uyu wa Kane tariki 26 Gicurasi 2022, ari mu modoka ya RCS.
Akigera mu cyumba cy’urukiko rwisumbuye rwa Nyarugenge, Ubushinjacyaha bwongeye gusaba ko uru rubanza rwashyirwa mu muhezo nkuko rwaburanishijwe mu Rukiko rw’Ibanze rwa Kicukiro.
Ni icyifuzo cyabanje kwamaganwa n’uruhande rw’uregwa ari we Prince Kid ndetse n’Umunyamategeko we Me Nyembo Emelyne aho bavuze ko gushyira uru rubanza mu muhezo nta shingiro bifite kuko nubundi rusomerwa mu ruhame.
Urukiko rwafashe icyemezo ko uru rubanza rushyirwa mu muhezo nk’uko byasabwe n’ubushinjacyaha kubera uburemere bw’ibiri muri dosiye y’uregwa.
Prince Kid akurikiranyweho ibyaha bifitanye isano n’ihohoterwa ryakorewe bamwe mu bakobwa bitabiriye irushanwa rya Miss Rwanda aho bikekwa ko yabatse ruswa y’igitsina abizeza amakamba.
Akurikiranyweho ishimishamubiri rishingiye ku gitsina yatse bamwe muri abo bakobwa ndetse no kubahoza ku nkeke aho akekwaho kubatitiriza abasaba ko baryamana.
RWANDATRIBUNE.COM
