Kuri uyu wa Gatatu tariki ya 27 Ukwakira 2021, nibwo urwego rw’ubugenzacyaha RIB rwari rwahamagaje umunyapolitiki Abdul Rashid Hakuzimana umaze kumenyekana mu biganiro bica ku miyoboro ya Youtube atanga ibitekerezo bitavugwaho rumwe
Rashid Hakuzimana yahamagajwe kwitaba uru rwego mu ibaruwa yamushyikirijwe kuwa 25 Ukwakira 2021 yanditswe n’umugenzacyaha Jules Mutabazi.
Umuvugizi w’Urwego rw’ubugenzacyaha mu Rwanda Dr Murangira B Thierry yabwiye itangazamakuru ko Rashid Hakuzimana nakomeza kwanga kwitaba ubugenzacyaha, hazakurikizwa icyo amategeko ateganya ku muntu wanze kwita ubugenzacyaha ku bushake.
Yagize ati “Icyo yatumirijwe ni we uzakimenyeshwa. Ariko bifitanye isano n’iperereza ryari rimaze iminsi rimukorwaho. Natitaba nk’uko byagenze, turakora icyo amategeko ateganya.’’
Itegeko No 027/2019 ryo ku wa 19/09/2019 ryerekeye imiburanishirize y’imanza z’inshinjabyaha riteganya ko iyo umuntu ahamagawe inshuro ebyiri atitaba, Ubugenzacyaha bwiyambaza Ubushinjacyaha kugira ngo hakorwe urwandiko rumuzana ku gahato ruzwi nka ‘mandat d’amener’, hanyuma akabazwa ibyo Ubugenzacyaha bwifuza ko asobanura.’’
Rashid Hakuzimana yaherukaga guhamagazwa mu bugenzacyaha kuwa 31 Kanama 2021 aho yari yagiriwe inama yo kwirinda ibiganiro bishobora kumushobora mu byaha birimo icyo gukwirakwiza ingengabitekerezo ya Jenoside.
