Abakunzi ba Rayon sports bafatanyije n’ubuyobozi bw’ikipe bakoze ibirori Gala Night bigamije kwishimira ibikombe bitatu ikipe imaze kwegukana.
Ibi byabaye ku mugoroba wo ku wa 25 Kanama 2023, aho Umuryango mugari wa Rayon Sports wakoze ibirori byo kwishimira ibikombe bitatu Rwanda Premier League ‘Women’, Peace Cup & Super Cup.
Ni umuhango wiswe ‘Rayon Sports Gala Night 2023.’ Abawutumiwemo, ni abakunzi b’iyi kipe bayihagarariye ndetse n’abasanzwe bagaragara mu bikorwa byose by’ikipe bikeneye ubufasha bw’amafaranga.
Abakunzi ba Rayon Sports bashimiye ubuyobozi bw’Umuryango n’ikipe, ku mbaraga zakoreshejwe ngo ibi bikombe biboneke. Uretse ibi kandi, bahize kwitwara neza kurushaho mu mwaka w’imikino 2023-2024. Mu bikombe bikinirwa imbere mu gihugu no mu irushanwa rihuza amakipe yatwaye ibikombe iwa yo, CAF Confederation Cup.
Abatumiwe muri ibi birori bashyigikiye urugendo Rayon Sports igiye gutangira rwo gusohokera Igihugu mu marushanwa ya CAF mu buryo bw’ibitekerezo n’amafaranga.
Ku mukino wa Mbere wa shampiyona iyi kipe yakinnye, yatsinze Gasogi United ibitego 2-1. Izagaruka mu kibuga ku Cyumweru tariki 27 Kanama 2023 icakirana na Gorilla FC kuri Kigali Pelé Stadium.
Jessica Umutesi
