RDC: Gereza ya Ndolo ivugwamo ubucucike yasanzwemo abarwayi ba Coronavirus
Inzego z’ubuzima muri Repubulika Iharanira Demokarasi ya Congo zemeje ko bwa mbere muri gereza zo muri icyo gihugu hagaragaye abarwayi ba Coronavirus, yatahuwe ku bagororwa bane.
Abagororwa basanganywe COVID-19 iterwa n’agakoko gashya ka Coronavirus, bari bafungiwe muri Gereza ya Ndolo iri mu Murwa Mukuru wa RDC i Kinshasa.
BBC dukesha iyi nkuru yatangaje ko abandi bagororwa bashyizwe mu kato mu kwirinda ikwirakwira ry’iki cyorezo cyugarije Isi.
Bivugwa ko Gereza ya Ndolo ifungiyemo abagororwa bakubye hafi inshuro enye umubare w’abo ifitiye ubushobozi bwo kwakira.
Imiryango iharanira uburenganzira bwa muntu ifite impungenge ko Coronavirus ishobora gukwirakwira byihuse mu zindi mfungwa no mu bajya kuzisura. Yasabye ko imfungwa zishinjwa n’izahamwe n’ibyaha byoroheje zirekurwa mu kugabanya ubucucike.
Abategetsi bo mu rwego rw’ubuvuzi bohereje itsinda ry’abaganga kuri iyo gereza kugenzura uko ikibazo cyifashe.
DR Congo imaze kwemeza abanduye coronavirus mu ntara zigera kuri zirindwi, ariko benshi mu banduye babonetse i Kinshasa.
Kuri uyu wa kane, ingendo zongeye gusubukurwa mu burasirazuba bw’igihugu, mu mijyi yo mu ntara zo muri icyo gice kugeza ubu kitaragaragaramo coronavirus.
Kuva Coronavirus ibonetse muri RDC, abantu 500 bamaze kuyisanganwa, muri bo 31 bitabye Imana mu gihe abagera kuri 65 bakize ndetse basezererwa mu bitaro.
Hategekimana Jean Claude
